IVIKELE IREKHODI LOKUNGEHLULWA I-ARROWS
ILIVIKELE irekhodi lokungehlulwa ilamontville Golden Arrows ibambana nechippa United ngo-1-1 kowe-absa Premiership izolo ngomgqibelo ntambama eprincess Magogo Stadium, Kwamashu.
Igoli le-arrows livalelwe enethini nguKnox Mutizwa ngomzuzu wama-64 licisha elechippa elishaywe ngukatlego Mashego ngowama-58.
I-arrows kayikehlulwa kwipremiership selokhu kuqale isizini entsha. Ichippa bese kuwumdlalo wesihlanu ilandelana inganqobi.
Le kilabhu isanda kuqasha uteboho Moloi njengomqeqeshi ngemuva kokukhomba indlela udan Malesela. I-arrows igcine ukuhlulwa ikhishwa yibidvest Wits kowemtn8 sekukhahlelwa amaphenathi.
Izinto zibukeka zimhambela kahle uclinton Larsen ongumqeqeshi we-arrows njengoba isaqhubeka nokuba sembangweni wokuqhwakela kwilog yepremiership. Ukwenza kahle kwale kilabhu kuyisondeza ethubeni lokuhlabana ngomklomelo weq1 okuzokube kuqala ukuthi utholwe yikilabhu yakwazulu-natal uma kwenzeka ihlabana ngawo.
Ichippa ibidlala kahle ngesiwombe sokuqala kodwa yahluleka yancama ukubhodloza udonga lwe-arrows okwenze kwayiwa ekhefini kungu-0-0.
Icape Town City ihlule omkhaya i-ajax Cape Town ngo-2-0 kowepremiership izolo ecape Town Stadium. Lo mdlalo ububhekwe ngabomvu kwazise la makilabhu ahlale eklolodelana ngokuthi ayizinkunzi zasecape Town. Icity inqobe ngamagoli avalelwe enethini nguvictor Obinna Nsofor nojudas Moseamedi.