Usephila ngaphansi kwemibandela owokhozi
EZOSAZIWAYO: Ukushada kushintshe impilo yakhe usthandwa Nzuza-gama
USEPHILA ngaphansi kwemibandela ezoshintsha impilo yakhe umsakazi wokhozi FM, usthandwa Nzuza-gama oshade emasontweni edlule, nomfundisi webandla i-new Christian Fellowship, umphostoli Philani Gama.
Akasavumelekile nokuba avele aphawule nje kwabezindaba kodwa sekufanele aqale athole imvume njengoba esengumama mfundisi.
Ngesonto eledlule ILANGA Langesonto lizame ukuba nengxoxo ekhethekile naye ngemuva komshado wakhe ukuze lithole ukuthi njengoba eseshade nomfundisi nje ngabe lokho kuzoyishintsha kanjani impilo yakhe.
Kuyinto engafihliwe ukuthi usthandwa ubevamisile ukubonakala ezindaweni zobumnandi, eyozithokozisa.
Ubeke abonakale futhi nasezinkundleni zokuxhumana efake izithombe abesuke ezithathe ebumnandini, eshaya iziphuzo.
Lo msakazi futhi kuyaziwa ukuthi uphinde ashayele uhlelo lwasebusuku okhozini olubizwa ngokuthi yibhampa 2 Bhamba ngoLwesihlanu ebusuku olungena phakathi kwehora lesi-8 nele-11, okuye kwenzeke ngezinye izikhathi lumkhiphe ayosakaza ngaphandle kwase-studio, ezindaweni zobumnandi.
Ngesikhathi leli phephandaba lixhumana naye ngesonto eledlule wale waphetha ukukhuluma nentatheli, wathi njengoba eseganile nje akasakwazi ukukhuluma ngaphandle kokuthola imvume kumyeni wakhe.
Uthe izinqumo akasazithatheli kodwa zithathwa ngumyeni wakhe.
Usthandwa uphinde aqashwe emicimbini yokujuxuza ayoba ngumphathi wohlelo. Nendawo ayilingisayo emdlalweni kamabonakude owuchungechunge Uzalo ibuye imenze awotawotwe phambi kwezigidi zabantu ezibuka lo mdlalo.
Ukuba ngumama mfundisi-ke kuyaziwa ukuthi akuyona into encane njengoba usuke usungumama webandla futhi usungumholi okubukelwa kuyena ubuhle bokuba senkosini.
Ngemuva kokuba ale waphetha ukuphawula, leli phephandaba libe selixhumana nomyeni wakhe umphostoli ugama. Yena ucele ukuthunyelelwa imibuzo nge-email, izimpendulo zase ziqhamuka kumnu Themba Mlambo okhulumela ibandla.
“Umanzuza Gama usengunkosikazi womholi webandla. Uyasiqonda isigaba asengene kuso sokuba ngunkosikazi. Kumanje usesimeni sokuhlanganisa umsebenzi abewenza, nomsebenzi womuzi, nomsebenzi webandla.
"Konke lokhu kulumbanisa le misebenzi kuzothatha isikhathi,” kuchaza umnu Mlambo.
Uqhube wathi bazomeseka emsebenzini wakhe wokuba ngumsakazi wokhozi FM nakuzona zonke izinhlelo zomsakazo azenzayo. Nokulingisa kumabonakude uthi ngeke bamyekise, uzoqhubeka nenkontileka yakhe kulo mdlalo.
Umnu Mlambo uthi njengoba umsebenzi wakhe (usthandwa) umxhumanisa nabantu abaningi bazomeseka ukuze asebenze ngokukhululeka.
“Kubalulekile nokho ukuba sikugcizelele njengebandla ukuthi ekumesekeni kwethu sizomkhu- thaza ukuba agxile ekwenzeni umsebenzi wakhe webandla asebizelwe kuwo wokuba ngumholi ebandleni. Njengakuzo zonke izigaba zempilo, kulindelekile ukuziphatha okuvumelekile ngokwesigaba asengene kusona,” kubeka umnu Mlambo.