BABIZWE NGEMINENKE ABADLALI BE-PSL
Ukadodia ubasola ngokunwabuluka enkundleni
USHIYE angalazi kubadlali bakhe ufarook “Ntshebe” Kadodia ongumnikazi wemaritzburg United ezakhe ziguqiswa yifree State Stars ngo-1-0 wegoli likasinethemba Jantjie kowe-absa Premiership ngolwesihlanu ebusuku eharry Gwala Stadium, emgungundlovu.
Iteam of Choice bekubhekwe ukuba ibuyise isithunzi kulo mdlalo njengoba ibikade iguqiswe yikaizer Chiefs ngo-2-0 kuyo le nkundla emasontweni ambalwa edlule.
Nokho iphoxile idlala umbozo webhola yagcina ngokuhlulwa. Bekufanele okungenani ibhudluzwe ngo-3-0 nokho yasizwa wukuthi ifree State ishaye ipali kwaze kwakabili.
Emuva kwalo mdlalo, ukadodia uzwakalise ukuthi abadlali bakhe ngathi bebengafuni ukuwugijima (lo mdlalo) ngendlela abadlale ngayo.
“Laba bafana kangazi ukuthi bebengenelwe yini, bekungathi yiminenke nje, benwabuluka kungavumi nokuthi benzeni.
"Bebephantshile kulo mdlalo, kabazange benze lutho. Uma kuwukuthi ifree State ifike nomthakathi hhayi uyasebenza bebethothongene abadlali bethu behluleka wukuyigqobhoza. Kodwa-ke ngisazokhuluma nabo bekungafanele siwuhlulwe lo mdlalo,” kusho ukadodia.
Uluc Eymael ocija ifree State, uthi konke kuhambe ngokohlelo.
“Inhloso yethu bekuwukuthi sibavove esiswini bangakwazi ukuphakela u-evans Rusike amabhola nangempela senza kanjalo bangakwazi ukudlala.
"Bengazi ukuthi uma sibenze kanjalo bazophelelwa wushatini nangempela bahluleka wukuqhamuka nezimpendulo sabehlula.
“Empeleni basindile, beku- fanele sibabulale ngenqwaba yamagoli, basizwe nayipali. Ngijabule kakhulu ngendlela esidlala ngayo futhi ngethemba ukuthi ngeke silehlise igiya,” kusho u-eymael odabuka ebelgium ongene kulesi sigqiki emuva kokugudluzwa kusona kukasammy Troughton obe ngumlolongi wokuqala ukudliwa yizembe kwipremier Soccer League (PSL) kule sizini.