Liyantenga ihhovisi lomvikeli womphakathi
NAKUBA isinqumo senkantolo ephakeme yasepitoli sakamuva sokuthi aluphuthumi udaba lokuba umengameli ujacob Zuma asungule ikhomishini ezokwenza uphenyo ngezinsolo zokubanjwa ngobhongwane kombuso waleli zwe siyinto engeke yabhekwa njengokunqoba kumengameli wezwe kodwa kukhona abaphenyeka izinqe ngalesi sinqumo.
Abebefake lesi sicelo esiphuthumayo enkantolo ephakeme bekuyiqembu ledemocratic Alliance (DA) nehhovisi lomvikeli womphakathi eliholwa ngu-adv Busisiwe Mkhwebane. I-DA nomvikeli womphakathi baphinde bakhokhiswa izindleko zenkantolo kulolu daba.
Kuzokhumbuleka ukuthi ngaphambi kokushiya esikhundleni sokuba ngumvikeli womphakathi, u-adv Thuli Madonsela ukhiphe umbiko obusola izicebi zomndeni wakwagupta ezinobudlelwano nomndeni kamengameli uzuma ngenkohlakalo nokubamba umbuso ngobhongwane.
Okuqaphelekayo-ke kulesi sinqumo senkantolo ukwehluleka ukungena egiyeni kwehhovisi lomvikeli womphakathi selokhu kuthathe u-adv Mkhwebane. Sekuyizikhawu eziningana leli hhovisi lithatha izinqumo eziphambene liphinde liphambane nehlombe lapho kufanele lithathe khona izinqumo ezifanele.
Sekungumlando ukuthi leli hhovisi lishaye ungqimphothwe ngombiko obukhishwe yilona qobo wokuthi makushintshwe imigomo yokusebenza kwebhange-ngodla (Reserve Bank) ophoselwe inselelo ngabaningi. U-adv Mkhwebane uphumele obala waxolisa ngalesi senzo, evuma ukuthi kube nezaluleko zomthetho ezingaphusile ngesikhathi ehlanganisa umbiko wakhe.
Kuyishwa ukuthi leli hhovisi ebelihlonishwa kangaka kusukela ngesikhathi sika-adv Selby Baqwa, Adv Lawrence Mushwana nangesikhathi sika-adv Thuli Madonsela likhombisa ukwehlelwa yisithunzi ngesivinini esikhulu selokhu izintambo zithathwe nguAdv Mkhwebane.
Kumanje leli hhovisi elisuka ezandleni ebezithathwa njengezifudumele zika-adv Madonsela liphoselwe inselelo yiphalamende, yihhovisi likamgcinimafa kazwelonke ne-absa Bank mayelana nombiko wokuthi abubanga khona ubulungiswa nokuvikelwa kwezimali zombuso ngesikhathi umbuso wobandlululo utakula ibhange ibankorp elagcina lithengwe yi-absa.
Ihhovisi lomvikeli womphakathi liphinde labonakala lidunguza oswini nakulo mbiko njengoba lisolwa ngokungayibheki imibhalo ebalulekile ephathelene nokudayiselana okwaba khona phakathi kwebankorp neAbsa kodwa lethembele emibhalweni yohlangothi olulodwa. Uma ihhovisi lomvikeli womphakathi liphinde likhala ngaphansi kulo mbiko walo, lokho kuyobe kusho ukuthi leli hhovisi, ezandleni zika-adv Mkhwebane selibhale imibiko emithathu edwanguzayo okuthi uma iphonselwa inselelo enkantolo kutholakale ukuthi ayinasisekelo.
Baningi asebephumele obala beveza ukungalethembi leli hhovisi kusukela kuthathe lo mholi walo omusha kanti liyaqhubeka nokwehlelwa yisithunzi. Kuyaziwa ukuthi I-DA izilwela izimpi zayo zepolitiki futhi akuyithunazi ndawo ukwehlulwa kwayo kwakamuva enkantolo kodwa lokhu kuzozwela kakhulu kuleli hhovisi lomvikeli womphakathi ngoba lona lithathwa njengelingachemile futhi elihluzisisayo ngaphambi kokuthatha izinyathelo. Kulokhu likhombisa ukuntenga okukhulu.