USONGELA AMAPHOYISA AMCHAPHE NGENHLAMBA OWE-DA
UHLELA ukuwathathela izinyathelo zomthetho amaphoyisa athi amkhombe ngezibhamu amchapha nangenhlamba umholi wedemo- cratic Alliance (DA) Kwazulu Natal, umnu Zwakele Mncwango ( osesithombeni).
Umnu Mncwango uthi uyosikhohlwa esengaphansi komhlaba isigameko esimehlele edolobheni Kwanongoma, enyakatho yekwaZulu Natal ngoLwesine. Echaza uthi ubezihambela nomndeni wakhe ngesikhathi imoto abehamba ngayo imiswa yikhumbi ebihamba abakwasidlodlo abebehlome beyizingovolo ngezibhamu ezinkulu. Uthi le khumbi iqhamuke ngesivinini ngemuva kweyakhe yamkhanyisela amalambu kodwa waqala wanganaka ngenxa yokuthi ibingenawo umbhalo okhombisa ukuthi ngeyamaphoyisa. Uthi iqhubekile nokumkhanyisa ngamalambu waze waphoqeleka ukuba akhiphele imoto eceleni komgwaqo.
“Ngesikhathi sengihamba kancane ngikhombisa ukuma, isicabha sangemuva sele khumbi bese sivele sivuliwe kunamaphoyisa abephethe izibhamu ezinkulu. Sengimile amaphoyisa abalelwa kwayisithupha asondele eduze kwemoto yami ekhombe ngezibhamu, ngehlisa iwindi alunguza abona ukuthi ngihamba nezingane nonkosikazi wami. Abe esengiyalela ukuba ngiphume ekhuluma budlabha amanye engichapha ngenhlamba,” kusho umnu Mncwango engeza ngokuthi ngaleso sikhathi ubebuza ukuthi kwenzenjani, kungabe kukhona amfunayo yini?
“Abonile ukuthi ngihamba nezingane kodwa indlela abekhuluma ngayo nami ibikhombisa indluzula nokulwa ekubeni mina bengingalwi. Isono sami kube wukuzama ukuwachazela ngamalungelo ami, athi ngazi kakhulu,” eqhube- ka nokuchaza.
Umnu Mncwango uthi ambuzile ukuthi ungubani wawaphendula, abe esembuza ukuthi baphi onogada bakhe?
“Ngibatshelile ukuthi anginabo onogada,” eqhuba engeza ngokuthi ambuze nokuthi ikuphi inganono yakhe, walandula ewatshela ukuthi akanayo.
Uthi lesi sigameko siwuhlukumeze kakhulu umndeni wakhe kangangokuba usezinhlelweni zokuwuyisa kodokotela abeluleka ngokwengqondo. “Indodana yami eneminyaka emine ebihleli ngemuva namanje iyabonakala ukuthi isethukile ngalesi sigameko. Inkosikazi nayo ibihleli ngemuva igone indodana yami esencane enamasonto ayisithupha kanti phambili bengihleli nendodakazi eneminyaka eyisi-11,” kulanda yena.
Okunye athi kuyamkhathaza wukuthi ngesikhathi kwenzeka konke lokhu bekunelinye iphoyisa ebelilokhu lishutha imoto yakhe njengoba egcine eselishutha. Uthi usexhumanile nebamba likakhomishana wamaphoyisa Kwazulu Natal ngalesi sigameko njengoba esemnxuse ukuba agcwalise isitatimende ngokwenzekile.
“Ngizohlangana nommeli wami ukuze angeluleke ngezinyathelo okumele ngizithathe ngoba angizimisele ukuyeka lolu daba lushabalale kanjalo ngoba kuyacaca ukuthi lawa maphoyisa ahlose ukuhlukumeza umphakathi ngendlela aziphatha ngayo,” kusho lo mholi.
lucky.cain@ilanganews.co.za