UNGASE UBHUNTSHE UMCIMBI NGENXA YOKUSWELA UXHASO
BAMINCILE abahleli benational Choral Music Achievement Awards (NACMA), banovalo lokuthi bangase baphindwe ngokubehlele ngonyaka wezi-2015 njengoba lo mcimbi ungazange uphumelele ngenxa yokuntuleka koxhaso lwemali.
Kuzokhumbuleka ukuthi nakuba umcimbi ugcine wenzekile ngonyaka owedlule, abamanacma batakulwe ngabenational Lotteries Commision (NLC).
Unkk Bulelwa Mvelase oyisikhulu esiphezulu samanacma, utshele ILANGA Langesonto ukuthi uthandazela ukuba umnyango wezobuciko namasiko Kwazulu-natal ubaxhase ngemali ukuze umcimbi uzoqhubeka. Uthi yize usuku lungakanqunywa kodwa bahlele ukuba umcimbi ube ngolwezi (November).
“Sisezingxoxweni nabomnyango mayelana noxhaso lwemali yokwenza umcimbi.
"Siyethemba ukuthi uzosixhasa (umnyango), asifuni ukuphindwa ngokwasenza ngonyaka wezi-2015.
"Sisebenza kanzima ukuba lo mcimbi wenzeke futhi ube yimpumelelo,” kusho unkk Mvelase.
Uveze nokuthi isicelo soxhaso basifake nakumasipala wetheku nakosomabhizinisi abazimele.
“Yize singakazitholi izimpendulo kodwa siyethemba ukuthi kukhona okuzoqhamuka maduze nje.
"Ngeke ngikhulume amanga, kunzima ukuhlela umcimbi ungenaso isiqiniseko sokuthi uzoba khona yini.
"Uma uxhaso lwemali lungekho, lokho kusho ukuthi amanacma akulo nyaka ngeke abe khona.
"Kuzoba buhlungu nakithina uma sigcina ngokuba singalutholi nhlobo uxhaso ngoba iphupho lethu bekuwukuba lo mcimbi wenzeke minyaka yonke.
"Akukho esingakwenza nathi uma uxhaso singalutholi,” kusho unkk Mvelase. Umcimbi wamanacma usungulwe ngusomabhizinisi umnu Vusi Mvelase ngowezi-2012.