IHAMBA EZINYATHELWENI ZIKAYISE INDODANA YOBENGUMSAKAZI
IZIBONA inekusasa eliqhakazile kwezokusakaza indodana kacyril Bongani Kansas City Mchunu owabe engumsakazi wodumo okhozini FM esebenzela esinye seziteshi zomsakazo womphakathi ethekwini.
Ubhekinkosi Tyson Mchunu (31) ungunjiniyela esiteshini esisakazela umphakathi Izwi Lomzansi esasungulwa ngumakade ebona kwezokusakaza uvela Xulu.
ILANGA Langesonto libe nengxoxo ekhethekile naye kwazise uyise uhambe emhlabeni eseneminyaka eyishumi nje kuphela. Uyise wayiqamba le nsizwa ngegama lomshayisibhakela wasemelika umike Tyson ezalwe ngezikhathi zakhe esashisa bhe egingqa amadoda, engumpetha womhlaba esigabeni sosondonzima.
"Ngenxa yokuba ubaba ubehamba nami uma eyosakaza ngibe nothando lokuba nami ngihambe ezinyathelweni zakhe noma ngingeke ngifinyelele ezingeni lakhe kodwa nami ngiyabona ukuthi ngimfuzile.
"Ngiyethemba ukuthi nami njengoba ngingunjiniyela ngingaba ngumsakazi uma nginganikwa ithuba ngoba kumanje nje ngiyazenza izikhangiso, bayalincoma iphimbo lami," kusho utyson
Uthi ube nenhlanhla yokuthi uthe eqeda esikoleni abangani bakayise uvela novictor Maswidi Xaba bamgona bamnika ithuba lokuyoba ngunjiniyela kulesi siteshi esesivuthiwe.
"Ngibabonga kakhulu obaba bami bobabili ukungemukela, ngihlezi kahle lapha kanginankinga. Ngibuye ngizenzele umsebenzi wami eceleni ngiqashwe ngenzele abantu i-sound. Ngiyethemba ngokuhamba kwesikhathi sizodalula okuhle esikuhlanganisayo siwumndeni ukugcina igama likababa limile kwezokungcebeleka," kuphetha utyson.
Ukansas City washiya embe umgodi omkhulu endimeni yezokusakaza, kuze kube manje eminyakeni engama-21 ashona akekho umsakazi okhozini FM owavala isikhala sakhe ngezinga lekhono lokusakaza. Uke waba nebhendi waba neqembu lebhola ikansas City Hot Spurs. knowledge.simelane@ilanganews. co.za