Inothile kwezokuvakasha ikwazulu-natal
Inezindawo ezisezingeni lomhlaba ongazivakashela
“UMA esaphatha ikhadi lakwa-capitec, khohlwa sisi ngeke uyibone idubai”.
Lena ngeminye yemibhalo eke yasabalala ezinkundleni zokuxhumana ikhombisa ukubukela phansi leli bhange noma abantu abalisebenzisayo.
Nakuba lo mbhalo uzwakala usahlaya kodwa ungifikisele ngomcabango wokuthi iningi labantu uma licabanga ukuvakasha lifikelwa amazwe aphesheya kwezilwandle njengayo idubai.
Kuyiqiniso elingephikwe ukuthi esikhathini samanje iningi labantu ikakhulukazi abesifazane linephupho lokuvakashela edubai ngenxa yezizathu ezahlukene. Ukuvakashela kodubai kusho ukuthi kumele uqongobezele imali ukuze uzokwazi ukubhekana nezindleko ezingencane - phela akudlali ukuvakashela phesheya kwezilwandle.
ASIKHO ISIDINGO SOKUCHITHA IMALI ENINGI
Asikho nesincane-ke isidingo sokuba umuntu usengaze aqhume impela, kudabuke amaphakethe ngoba nje efuna ukuvakashela phesheya kwezilwandle.
Lokho akunankinga uma unayo imali kodwa uma lingaqinile kahle iphakethe ziningi izindawo umuntu angazivakashela khona lapha eningizimu Afrika, abuyele ekhaya ebheme wakholwa.
Iningizimu Afrika yizwe elinothile ngomlando nangezindawo zokuvakasha ezisezingeni lomhlaba kodwa kuyadumaza ukuthi kunabantu abazi ukuthi uma kukhulunywa ngeholidi kushiwo ukuthi khwela ibhanoyi unqamule amazwe.
Njengoba bekugujwa inyanga yezokuvakasha umandulo (September), bekugxilwe kakhulu emikhankasweni yokukhuthaza abantu ukuba bavakashele ezindawe- ni ezikhona kuleli. Nami ngibe nenhlanhla engandelebani njengoba ngithole ithuba lokuvakashiswa yitourism Kwazulu-natal (TKZN), saboniswa ezinye zezindawo ikwazulu-natal egabe ngazo kwezokuvakasha.
INEZINDAWO EZINHLE INEWCASTLE
Phakathi kwezindawo esizivakashele kubalwa nenewcastle. Leli yidolobha elimaphakathi nesifundazwe ligabe ngezintaba, umlando nangezigameko ezenzeke kudalo. Ngivakashele kuleli dolobha ngesikhathi kunomcimbi wokwethulwa ngokusemthethweni kwenyanga yezokuvakasha.
Lo mcimbi ubusehhotela likanokusho ivulintaba Country Hotel and Spa elakhiwe ngasezintabeni zasenewcastle, kanti lidle nange- ndawo yokudlala igalofu. Kukulo leli hhotela lapho kushadelwe khona oke waba yisishoshovu seANC Youth League umnu Magasela Mzobe. Lo mshado ubuhanjelwe ngosaziwayo nezikhulu ezahlukene kuhulumeni okubalwa kuzo nomengameli Jacob Zuma.
Omunye umlando ngenewcastle wukuthi kunesikole iblaauwbosch Senior Primary School okuyisikole okwafundisa kusona oke waba ngumengameli we-african National Congress inkosi Albert Luthuli, ophinde wahlabana ngendondo yokuthula emhlabeni (Nobel Peace Price). Uma uvakashele leli dolobha ungakwazi ukuzibonela lesi sikole uthole nomlando ngenkosi Luthuli ngesikhathi ifundisa kulesi sikole njengoba ichithe iminyaka emibili kusona.
Ikhona futhi nendawo yezilwane edolobheni elikudebuduze i-utrecht, lapho kunesiqiwi ibalele Game Park.
AMANXUSA EZOKUVAKASHA ABABAZA UBUHLE
Amanxusa ezokuvakasha KwaZulu-natal usiphesihle Ngwenya odume ngelikasphectacular, nolebogang Naves odume ngelikanaves nabo bathole ithuba lokufunda kabanzi ngezindawo zokuvakasha kulesi sifundazwe.
Phakathi kwezindawo lawa manxusa angabasakazi begagasi FM azihambelile kubalwa emhlathuze, Kwamhlabuyalingana, Natal Meadlands nesogwini. Kulezi zindawo bavakashele izindawo zokuvakasha ezahlukene okubalwa kuzo izindawo zokugcina umlando namagugu, yisolwandle, yiziqiwi nezinye zokuzithokozisa ngezindlela ezahlukene.
Unaves ongowokudabuka esoweto uthe ufunde lukhulu ngalesi sifundazwe kanti indawo emhlabe kakhulu umxhwele kube icanelands Beach Club and Spa, esedolphin Coast, esalt Rock.
“Konke ngecanelands kungibusisile futhi nakanjani ngingabuyela khona uma ngithola ithuba. Yindawo enhle futhi enakho konke okudingayo uma ufuna ukushaywa wumoya,” kusho lo msakazi okhale kakhulu ngokubanda ezindaweni ezakhelene nesichuse lapho okwaboshelwa khona umnu Nelson Mandela ebizwa ngenelson Mandela Capture Site.
KUNINGI OKUTHOKOZISAYO ENINGIZIMU AFRIKA
Kuzo zonke lezi zindawo engizivakashelile noma engifunde ngazo kulesi sifundazwe ngibonile ukuthi ngilunge ngingayazi idubai uma izwe engidabuka kulona linakho engikudingayo kwezokuvakasha.
Inyanga yezokuvakasha ngiyiphothule ngeledlule ogwini lapho ngenze into ebengikaze ngiyenze empilweni yami i-ocean safari, lapho sitshuze ngesikebhe olwandle sabona imikhoma, izinhlobo zezinhlanzi ezitholakala maphakathi nolwandle okubalwa kuzo ne-flying fish, abaningi asebecabanga ukuthi yisiphuzo sotshwala kanti cha wuhlobo lwenhlanzi.
Nakuba lokhu kungabadalela inkinga abangazwani nolwandle kodwa kuyathokozisa ukubona imikhoma eduze itshuza eduze kwesikebhe.
Ngakho ngaphambi kokuba uze ucabange kude noma ucabange ngokuchitha izizumbulu zemali uvakashela emazweni akude cabanga eduze ngoba kuningi ongakuthola futhi okuthokozisayo ngesifundazwe okusona.
Njengoba kuza amaholidi kazibandlela (December) kuyokusiza ukuba ubhekisise uma ufuna ukuvakasha njengoba ungathola okuningi ngamanani ahambisana nephakethe lakho ngaphandle kokuba uze uwele uye phesheya kwezilwandle.
lucky.cain@ilanganews.co.za