IBUYE NGENGOMA ENTSHA I-AFRO SOUL
LIFUNA ukuqhakambisa izindawo zetheku iqembu lomculo we-afro pop, i-afro Soul, elisanda kukhipha ingoma eshisa izikhotha kulezi zinsuku esihloko sithi “Inkomo Yami”.
Leli qembu ebelimele leli dolobha kwi-essence Festival yaphesheya kwezilwandle, lihlanganise le ngoma nesilomo somculi kamaskandi, ukhuzani Mpungose.
Uthandeka Zulu oyilunga lesifazane kuleli qembu, uthi nakuba umculo wabo ungowabo bonke abantu baseningizimu Afrika kodwa itheku lidlala indima enkulu ukubeseka njengoba sebaziwa naphesheya kwezilwandle ngenxa yoxhaso abaluthole kulona leli dolobha.
“Njengoba sizoqopha i- music video, kuhle ukuba sikhombise ukulibonga itheku ngokuveza izindawo ezinhle leli dolobha eligabe ngazo.
" Le ngoma esizobe siqopha i-video yayo kuyasijabulisa ukubona abantu beyithakasela ngale ndlela kanti sizoba nazo iziqephu zasemakhaya njengoba kuyingoma yesintu,” kusho uthandeka.
Usabelo Ngema naye oyilunga laleli qembu, ufakazele umazulu ngokuthi sekunesikhathi bengakhiphi kanti ngale ngoma bafuna ukutshengisa abathandi bomculo uku- thi basekhona endimeni yomculo futhi basazoqhubeka nokudedela izingoma ezithandwa ngabantu.
“Sikhethe ukusebenza nokhuzani ngenxa yekhono lakhe emculweni futhi nabantu bayalithakasela iphimbo lakhe njengoba lihambisana kahle namaphimbo ethu.
"Kusijabulisile ukwethula le ngoma ezindlini zokusakaza okhozini FM ngeledlule,” kusho ungema kanti useargent Malishe uyilungu lesithathu kuleli qembu.
Uthe le music video izoqoshwa ngolwesibili ezindaweni ezahlukene okubalwa kuzona ezasemakhaya nasenkabeni yedolobha itheku.
Uphethe ngokuthi abantu bazoqala ukuyibona maduze eziteshini zomculo kumabonakude kanti isiqalile ukudlalwa emisakazweni eyahlukene.