SIVULA AMEHLO ABACULI:
UMKHONTO ugwaza ekhaya namuhla, sicikica amehlo kozakwethu abayizintatheli nabasakazi abasebenza ngomculo kulo lonke leli. Sibanxusa ukuba bazinike isikhathi baziqeqeshe ezindabeni zalo mkhakha ngoba ujulile.
Kukaningi sifunda izindaba siphinde silalele imisakazo, sibuke nomabonakude kucace ukuthi kuningi okumele kulungiswe kozakwethu.
Iningi lozakwethu liyawudlala umculo kepha kalizihluphi ngokufunda ngawo, lithole ulwazi. Intatheli ebhala ngezindaba zomculo kumele ithole imiqingo yasemanyuvesi noma ezikoleni zomculo ifundisise kahle ize ibuze uma ingaqondi.
Umculo wamanothi nezagila akube yinto abayaziyo ozakwethu bangafuniseli. Njengoba abantu esibalobelayo beyizingcweti zawo bakuzwa uqala ukuloba noma ukukhuluma emsakazweni ukuthi kumnyama ebusweni benkawu.
Ngonyaka we-1991 ngiqala ukungena emculweni okhokhelwayo ngazihlupha ngaya enhlanganweni isouth African Music Organisation (SAMRO), egoli, ngacela owayeyisikhulu sakhona umnu Morake ukuba angiqeqeshe ngemithetho yonke ebusa abaculi namalungelo abo. Ngachitha impelasonto yonke ngifundiswa ngayo yonke imininingwane nangezinkontileka zabaculi, ngaqhubeka ngazifundela ngoba ngabe ngiwufundile esikoleni umculo wamanothi nezagila.
Siyabakhuthaza ngempela ozakwethu ukuba baye ezinhlanganweni ezimele abaculi ezifana nayo I-SAMRO NECAPASO, uma befika lapho bacele amafomu nemithetho elawula abaculi ukuze baphakele abantu okuyikho, bangaphaphalazi.
Kuye kudumaze ukufunda udaba lwentatheli engalwenzanga uphenyo ikakhulukazi uma kufike abaculi bezokhononda ngezinkampani noma ngophrojusa, uthole ukuthi yona ngenxa yokungabi nolwazi izothatha uhlangothi olulodwa olujivazayo.
Kungumsebenzi wethu njengezintatheli nabasakazi ukuba sivule amehlo abaculi bethu abangalitholanga ithuba lokufundiswa ngezindaba zomculo ngoba ziningi futhi zijulile.
Kukhona abasakazi abaze behlulwe ngisho ukubiza amagama abaculi nezihloko zezingoma. Angisayiphathi eyokubhimba umlando wamaqembu noma womculi - kuvele kuzwakale ukuthi umuntu akazifundi izincwadi nemilando.
Ozakwethu emaphephandabeni bayajaha ukukholwa ngokushiwo wumthombo othembekile bese bengaphenyisisi kugcine sekuyiswana ezinkantolo iphephandaba lizithole selixolisa noma lingene engxavuleni ngenxa yobudedengu benkeshezana yolwazi olungaphelele lwentatheli.
Imisakazo nomabonakude namaphephandaba mababe nezingosi noma izinkundla lapho kulandwa khona izingcweti zomculo nabezinhlangano bezochazela abaculi abadala nezimfundamakhwela ngalo msebenzi.
Bonke abathintekayo kwezomculo abazihluphe ngokuhambela amakhonsathi emiculo enhlobonhlobo bazigcwalise ngolwazi. Kuba kubi ukuba umuntu abhale noma akhulume agxeke uhlobo oluthile lomculo engakaze aluhambele noma alulalele.
Uma uyintatheli ekhaliphile awubandlululi, uyihambela yonke ukuze ukhulume ngento oyaziyo.
knowledge.simelane@ilanganews. co.za