Uyilunga lokuqina lebandla IZCC
KUMKHUTHAZE ukuba asebenze ngokuzikhandla nokulangazelela ukuzimela ukukhulela emndenini onezingane eziningi umark “Professor” Mayambela osanda kukhuza ibuya kwichippa United egijima kwi-absa Premiership.
Umayambela uzalelwe ekhayelitsha, ecape Town. Lo mdlali uqale ukubonakala ebholeni edlala kwiFast X1 wabe esedlulela kwimother City ngowezi-2002. Udlale kule kilabhu iminyaka emithathu wabe eseqoma iterritarians FC ngowezi-2005.
Ngemuva kokushiya le kilabhu ube esethathwa yi-old Mutual Academy ayijoyine ngowezi-2006.
Le kilabhu imvulele iminyango njengoba ethathwe yikilabhu ebigijima kwisouth African Football Association (Safa) Free State ABC Motsepe League (ibisabizwa ngeVodacom League) ebingaphansi kwebloemfontein Celtic. Le kilabhu ibicijwa ngudavid Modise ngowezi-2007.
Umayambela uthi ubonwe nguKhabonina Zondo obeqeqesha iphunya Selesele ngaleso sikhathi wamnika inkontileka yokugijima kwipremier Soccer League (PSL) ngowezi-2008. Usuke kuyona wajoyina i-orlando Pirates asuke kuyona wagcugca emakilabhini amaningi kuleli, kanti uke wathi qu phesheya kwezilwandle. Ingxoxo YELANGA Langesonto nomayambela ngempilo yakhe yangaphandle kwenkundla ihambe kanje:
ILANGA Langesonto: Ikuphethe kanjani impilo kwazise usukhuza ihlandla lesibili kwichippa?
Mayambela: Ngeke ngiqambe amanga abalandeli bangithakasele kakhulu. Kuyajabulisa ukuba sendaweni othandwayo kuyona. Yingakho kungazange kungithathe isikhathi eside ukunquma ukuza lapha ngesikhathi ngithola ucingo kusihlalo wekilabhu, usiviwe “Chippa” Mpengesi.
ILANGA Langesonto: Ukhule ekhaya elinjani?
Mayambela: Mhhhh (ekhokha umoya). Bekunzima kakhulu kwazise ukukhulela elokishini kunenselelo yokushoda kwendawo yokulala njengoba izindlu eziningi zinamakamelo amane nje kuphela ekubeni besili-16 sesisonke ekhaya. Yingakho thina esibancane besihlala ngaphandle emkhukhwini. Bekunzima kakhulu ngoba kwesinye isikhathi bengilala ngingadlile.
ILANGA Langesonto: Ungumuntu onjani?
Mayambela: Ngibakhonzile abantu. Ngiyakuthanda ukusiza abantu kwazise nami ngikhule ngiswele. Okunye engijwayele ukuzithokozisa ngakho wukuxoxela abantu ngempilo yami ukuze bafunde kimina ngempilo.
ILANGA Langesonto: Bebekuphi abazali bakho ulala ungadlile?
Mayambela: Umama (ulungiswa Mayambela) ubewa evuka nathi kanti ubaba (uvulithuli) ubengahlali nathi.
ILANGA Langesonto: Pho beniphila kanjani ningabafana ngoba beninezidingo ezidinga ubaba ngqo?
Mayambela: Besiphephela kogogo nakomalume kwazise umama ubengasebenzi. Ngikhumbula kahle ukuthi umama ubehola ur980 wesibonelelo sikahulumeni kodwa yize kunjalo besikwazi ukuqhuba impilo.
ILANGA Langesonto: Usushadelwe?
Mayambela: Cha, kodwa senginaye umuntu engiphilisana naye futhi sesinendodana, ulonwabo.
ILANGA Langesonto: Uyakwazi ukupheka?
Mayambela: Yebo, empeleni nje ngeke ungithinte emabhodweni. Ngikhonze ukudla kwesintu ikakhulukazi inyama ehambisana nedombolo kumbe isitambu.
ILANGA Langesonto: Ngabe usichitha kanjani isikhathi sakho?
Mayambela: Ngikhonze ukuzipholela nabangani bami, sishaywe umoya. Ngesinye isikhathi sihambela izinxanxathela zezitolo siyobheka okokugqoka. Phela ngiyakuthanda ukugqoka kahle.
ILANGA Langesonto: Hlobo luni lomculo olukhonzile?
Mayambela: Ngikhonze umculo onemba ngqo enhliziyweni futhi onomyalezo ikakhulukazi irnb kanti nedeep House ngiyayidlala uma ngihleli nabangani bami.
ILANGA Langesonto: Yisiphi isilwane osesabayo?
Mayambela: Yinyoka, ngiyesaba ukufa. Ngisho noma kuthiwa isifile kangidlaleli kuyona.
ILANGA Langesonto: Yini eyokuqala oyenzayo uma uvuka ekuseni?
Mayambela: Ukubheka ucingo lwami bese ngishayela umfowethu phesheya kwezilwandle ukuzwa ukuthi konke kuhamba kahle yini ngaphambi kokuthinta umama.
ILANGA Langesonto: Kuke kwavela ukuthi kawuziphethe kahle, ngabe lokho akuwuphazamisanga umndeni wakho?
Mayambela: Ibuhlungu into eyenzeka eningizimu Afrika. Sengiyasaba ukuxoxa nabezindaba kwazise ngesinye isikhathi kuke kubikwe izinto ezingelona iqiniso okuyinto ebuhlungu kakhulu. Nokho unkulunkulu emuhle ukwazile ukungiqinisa mina nomndeni wami.
ILANGA Langesonto: Ukhonza kuliphi ibandla?
Mayambela: Ngingaphansi kwezion Christian Church (ZCC). Ngiyithanda kakhulu IZCC ngoba ngifunde okuningi khona kubalwa nendlela ekahle yokuziphatha emphakathini.
ILANGA Langesonto: Uphatha nhloboni kamakhalekhukhwini?
Mayambela: Yi-iphone 7, yinhle kakhulu futhi ikwenza konke engikufunayo. Ngikhona cishe kuzona zonke izinkundla zokuxhumana futhi nginanekhasi engixhumana kulona nabalandeli bami ngqo.
ILANGA Langesonto: Utshabaza ngamotoni?
Mayambela: Ngihamba ngebmw i330. Nokho nginazo nezinye.
ILANGA Langesonto: Yimuphi umbala owuthandayo?
Mayambela: Ngizifela ngomhlophe kwazise ungenza ngizizwe sengathi ngizelwe kabusha empilweni.
ILANGA Langesonto: Yimuphi umdlali okhule ubukela kuyena?
Mayambela: Akekho omunye odlula uteko Modise. Ungumdlali osifundise okuningi okuhle ngempilo ikakhulukazi ngendlela enhle aziphatha ngayo.
ILANGA Langesonto: Yiliphi izwe ofisa ukuyoshaywa wumoya kulona?
Mayambela: Ngiyithanda kakhulu isweden kwazise ngike ngadlala khona. Nakuba ngike ngavakashela espain kodwa ngisanesilonda sokufisa ukubuyela khona ngiyovakasha futhi noma ngiyodlala ibhola. Ngikholelwa ekutheni kangikalifezi iphupho lami lokuzakhela igama phesheya kwezilwandle.
ILANGA Langesonto: Ufisa ukudlala ibhola uze ube neminyaka emingaki?
Mayambela: Ngingathokoza kakhulu uma ngingase ngifinyelele eminyakeni engama-35 ngisaligenda ibhola. Empeleni ngifuna ukulidlala kuze kuhluleke zona izinyawo ukulikhahlela.
ILANGA Langesonto: Yiziphi izinhlelo onazo ngemuva kwebhola?
Mayambela: Ngisebhizinisini lokuhlela imicimbi ecape Town. Uma sengibeke amakhokho ethala ngizogxila kakhulu kulona. Ngiyakuthanda nokubuyisela ulwazi emphakathini ongesekayo ngokucija intsha ezifela ngebhola.
ILANGA Langesonto: Uthini umyalezo wakho entsheni?
Mayambela: Kumele izinikele ngokuphindiwe uma ithanda unobhutshuzwayo kodwa ingakhohlwa yisikole. Uma unelson Mandela azalelwa emakhaya kodwa wakwazi ukukhulula leli lizwe pho yini engahlula omunye umuntu ekufezeni iphupho lakhe? Konke kuyenzeka uma unephupho futhi usebenzela ukulifeza.