UBENNI UZIBONA ENESIKWELETU
UZIBONA enesikweletu ubenni Mccarthy ongumqeqeshi wecape Town City ezobhekana nesuperSport United kowamanqamu WEMTN8 ozokuba ngomgqibelo ngo-19h00 emoses Mabhida Stadium, ethekwini.
Umccarthy utshele leli phephandaba ukuthi unesifiso sokunika ithuba lokuzibonakalisa abadlali abaningi abasebancane njengoba naye elitholile okwenze washeshe wagqama kunobhutshuzwayo. Uthi lesi yisikweletu esisenhliziyweni yakhe afisa ukusikhokha njengoba esengumqeqeshi.
Nokho uthi kakubanga lula ukuthi akhuphulele esikwatini esikhulu abadlali abebegijima kwimultiChoice Diski Challenge (MDC) yale kilabhu ngesizini edlule kwazise uthathe lo msebenzi isikhathi sesidliwe yinja, sekumele alwele ukuzama ukuqala ngenothi elihle.
Uthi yingakho esamukele ngezandla zombili isimemo sabakwacoca Cola sokuhambela imidlalo yabaneminyaka engaphansi kweli-15 ubudala esongwa namuhla ngesonto ethekwini.
“Ngihlele ukuthi kube khona izinhloli nakulo mqhudelwano ukubheka ikhono. Ngiyakholelwa kakhulu kubadlali abasebancane kwazise basuke besakulambele ukuvelela.
"Phela nathi sanikwa ithuba sisebancane lokuyodlala phesheya kwezilwandle,” kusho lo mqeqeshi onxuse nezinye izinkampani ukusika iphethini kwabakwacoca Cola ukuseka unobhutshuzwayo wabadlali abasebancane.
Ipremier Soccer League (PSL) imemezele ukuthi owamanqamu WEMTN8 uzovulelwa yidili lomculo elizoqala ngo-16h00 ukukhuthaza abalandeli ukufika ngesikhathi kulo mdlalo. Kuzokube kuboshelwe udj Tira, ubabes Wodumo ukukha nje phezulu.