Isafa kumele iholwe yizingwazi zebafana
lwe wukuthi kuningi ezingakwenza nxa zikhethelwa ebuholini besafa.
Izingwazi kumele ziyeke ukufuna ukuqashwa yisafa nokuhlaziya ibhola kumabonakude, kodwa mazingene zigamanxe ebuholini besafa egcwele osopolitiki abangalikhathalele ibhola kodwa abajabulela ukutetemuka emahhotela ehlukene.
Kungenzeka ukuthi ibhola lethu ligida ndawonye ngenxa yokuholwa ngosopolitiki okwaziwa kahle ukuthi bagubuzelwe umhobholo, inkohlakalo namanga okufakazelwa wukuthi baqabula ngisho izingane ezinamafinyila nxa bekhankasela ukhetho bese befungwa nxa sebesezikhundleni.
Nokho-ke kuyajabulisa ukuzwa isafa ihlongoza ukuthi zisabalale izwe lonke izikhungo ezifana NEKZN Academy.
Cishe lokhu kungabamba iqhaza elibonakalayo ekuthuthukisweni kwebhola. Okuhle ngalesi sikhungo wukuthi sinobudlelwano namazwe ahlukene okuyinto evulela abadlali amasango okuya e-europe besebancane.
Akukho ukungabaza ngokuthi ukupholishwa kwezingane zisencane ezinkulisa zifundiswe uhlobo olulodwa lwebhola kungenza ukuba ahlomule kakhulu amaqembu esizwe. Umccarthy nopienaar bakhuluma into abayazi kahle njengoba nabo bepholishwe kunobhutshuzwayo besebancane.
Ubenni ubegijima kwiseven Stars ngaphambi kokukhula azakhele udumo emhlabeni. Upienaar ukhuliswe eschool of Excellence okuyisikhungo esikhiqize inqwaba yabadlali bezinga eliphezulu kuleli. Nokho-ke lesi sikhungo sidonse kanzima ngemuva kokuphuma kwabakwatransnet abebeseseka ngemali.
Ibhola lezikole selikhombise kaningi ukuthi liwumgogodla wokukhiqizwa kwabadlali. Ngiyahambisana nombono wokuthi amakilabhu kumele asebenze nezikole ezithile ukuze basheshe bapholisheke kahle abadlali abenza kahle. Iningi labadlali bebafana Bafana bakhiqizwe yimidlalo yebhola lezikole ehlelwa yisouth African Schools Football Association.
Ngihlale ngizibuza ukuthi ibafana ngabe ikuliphi izinga ukuba bafukanyelwa bonke abadlali bamatsetse Flies abanqoba idanone Nations U/12 Cup ngowezi-2003 efrance. Umdlali ogcine ephumelele kulesiya sikwati nguKamohelo Mokotjo wasefree State okumanje udlala kwibrentford FC yase-england nakwibafana.