Kuputshuka impande kakomphela kwichiefs
Umotaung uthi uyakwazi okudingwa ngabalandeli
IMALI isize usteve “Mphathi” Komphela ongumqeqeshi wekaizer Chiefs wasinda ezembeni ebelilenga phezu kwentamo yakhe.
Ukomphela kazimhambeli kahle izinto selokhu ethathe lo msebenzi kumasizini amabili nesigamu edlule. Selokhu efikile le kilabhu kayikaze inqobe nkomishi. Abalandeli bayo kabasamfuni nalapho enyathele khona njengoba bemsola ngokubulala ikilabhu yabo.
Uphume ngesamagundwane ichiefs iguqiswa yibaroka FC ngo-2-1 kowe-absa Premiership ngeledlule emoses Mabhida Stadium, ethekwini. Leli phephandaba lithole ukuthi ngokuqala kwesonto amalunga ebhodi lechiefs abe nomhlangano ebhunga ngodaba lokukhululwa kukakomphela.
Empeleni kuthiwa bese uphumile umyalelo wokuba afakwe amasondo kodwa kwavimba itshe lemali okufanele ichiefs imkhokhele lona nxa kuyiyona emxoshayo. Kuthiwa kunenkontileka esayinwe yimenenja-jikelele yechiefs, ubobby Motaung, ngukomphela nomphathi wakhe ekubeka ngokusobala ukuthi uma exoshwa kufanele ichiefs imkhokhele yonke imali yakhe, kodwa uma ezisulela uyohamba nafika nakho.
Kuthiwa njengoba ukomphela engazisuleli nje, yingoba uyazi ukuthi ichiefs uyibambe ngale nkontileka. Umthombo waleli phephandaba ulihlebele ukuthi ukomphela ugoduka nemali engaphezulu kukar500 000 zinyanga zonke kwichiefs engakafakwa amabhonasi.
Ichiefs uma inganquma ukumuxosha manje, kuzofanele imkhokhele imali engaphezulu kuka-r4,5 million bese iqasha omunye futhi umqeqeshi naye imholele itshe lemali. Kuthiwa kunezikhulu ngaphakathi kwichiefs ezijabula kabi uma ejijinyezwa ngabalandeli ngoba zisuke zicabanga ukuthi uzozisulela emsebenzini kodwa angayingeni leyo ukomphela.
Leli phephandaba lishayela umotaung ngalolu daba, unqabile ukuphawula ngalo, wathi ngolwangaphakathi futhi sebedlulile kulona.
“Into edingwa ngabalandeli wukuthi sinqobe nje qha, uma singanqobi abalandeli bayadinwa. Umqeqeshi naye simtshelile ukuthi kudingeka ukuba sinqobe ukuze siqede yonke le nto ngoba uma kungenjalo kusazokuba nzima. Engikucelayo kubalandeli bethu wukuba behlise imimoya, izinto zizolunga.
“Ngeke sikwazi ukuvele sixoshe umqeqeshi nje manje isizini isanda kuqala, yinde kabi indlela esisabhekene nayo. Uma singanqobanga siyahlala nomqeqeshi simbuze ukuthi konakale kuphi sizame ukumsiza ukuze kulunge izinto,” kusho umotaung.
Limbuza leli phephandaba ukuthi ngabe bebengakwenzi yini phambilini ukuthi uma le kilabhu ihluliwe bahlale nomqeqeshi bazame ukumsiza uvele wabhoka ngolaka, wathi: “Uyabona-ke kangifuni silokhu siqophisana kube sengathi sinenkulumo mpikiswano.
“Kudala saqala ukukwenza lokho yikhona nje ukuthi izinto kazihlangani kahle. Kuke kube sengathi ziyalunga kuphinde kubhede. Ebholeni vele-ke kuba njalo ziyafika izikhathi ezinzima kodwa zibuye zidlule.”
Limbuza ukuthi ngoba kudala baqala kodwa izinto kazihlangani ucabanga ukuthi ziyohlangana nini, uthe: “Kangazi ukuthi zizohlangana nini kodwa zona zizogcina zihlangene. Ithemba kasililahlile futhi ngabe senza iphutha elikhulu uma singalilahla.”