IBHEKENE NENGWADLA IBAFANA BAFANA
IBHEKENE nengwadla ibafana Bafana ngaphambi kwemidlalo emibili emqoka nesenegal yokugcina yokuhlungela ukungena emqhudelwaneni wendebe yomhlaba ozokuba ngonyaka ozayo erussia.
Ibafana ibuyise ithemba ngokuya kulo mqhudelwano inenebula iburkina Faso ngo-3-1 izolo ngomgqibelo ntambama EFNB Stadium, egauteng. Amagoli okunqobe ngawo ibafana avalelwe enethini ngupercy Tau ngomzuzu wokuqala, uthemba Zwane ngowama-32 nosibusiso “Villa” Vilakazi ngowama-46 okwenze kwayiwa ekhefini ibafana ihamba phambili ngo-3-0. Eleburkina Faso libekwe enethini ngu-alain Traore ngobuchule kuyi- free-kick ngomzuzu wama-86. Utau uqokwe njengomdlali ovelele kulo mdlalo njengoba ebeyiphela endlebeni ezitobheni zezitha.
Ibafana izogijima imidlalo emibili yokugcina nesenegal ixhugela njengoba ezokube engekho u-andile Jali othole ikhadi eliphuzi izolo elimjikijela ngaphandle emdlalweni wokuqala ozokuba ngolwesihlanu mhla zili-10 kulwezi (November) ngo-19h00 epeter Mokaba Stadium, epolokwane.
Lo mdlali kulindeleke ukuba akhuze ibuya kowokugcina nesenegal ozokuba ngolwesibili lomhla zili14 enyangeni efanayo ekuhambeni. Ubongani “Ben 10” Zungu ngeke ayidlale yomibili le midlalo njengoba enikwe ikhadi elibomvu kowayizolo. Nokho lishiye imibuzo eminingi ikhadi elinikwe uzungu njengoba bekucaca ukuthi ubeyokhuza umdlali weburkina Faso osuse udweshu engqubuza owebafana ngendololwane ngamabomu.
Ustuart Baxter ongumqeqeshi webafana, wenze izinguquko eziyisi-8 esikimini esihlulwe yicape Verde Island emidlalweni emibili ebingenyanga edlule yokuhlungela lo mqhudelwano. Kubukeke kumsebenzela ukubophela abadlali abazanayo njengoba emuva maphakathi ebevale ngomorgan Gould noclayton Daniels abadlala ndawonye kwisupersport United. Bekubukeka kulula ukuxhumana ku-itumeleng Khune ovimbela ibafana nogould njengoba bedlale isikhathi eside ndawonye kwikaizer Chiefs. Ubaxter kumsize kakhulu ukubophela abadlali bemamelodi Sundowns abanesipiliyoni sokugijima emidlalweni yase-afrika. Ukudidiyelwa kwabadlali bedowns kuthele izithelo njengoba kuyibona bodwa abavalele amagoli okunqobe ngawo ibafana.
Kulo mdlalo kucacile ukuthi abantu bese beliphonsile ithawula ngeBafana njengoba ububukwa yinkeshezana yabalandeli yize bekuthiwa kuthengwe amathikithi ayizi-18 000. Kuze kwaphoqeleka ukuthi kwehliswe intengo yamathikithi okubuka lo mdlalo ngenxa yokuhudula izinyawo kwabalandeli ukuwathenga.
Ibafana idlale ibhola elihlelekile cishe kuzona zonke izingxenye. Lesi sikwati besisebenzisa ijubane nokuphaselana ibhola ngokushesha ngemuva kokuliphuca izitha. Lokhu kubukeke kuzidida izitha njengoba bezivuleka kalula emuva. Uthamsanqa Mkhize wecape Town City obeqala ukugijima kwibafana kowayizolo, ubewapheke ngebhodwe elincane amafolosi eburkina Faso ekubeni nosifiso Hlanti webidvest Wits ubebuye ashoshele mawala phambili. Ukhune ube nesandla emagolini amabili ebafana njengoba engene ngemuva kweminyakazo yakhe. Nokho zimdide zamqeda izinduku ngesikhathi utraore evalela i- free-kick yezinga eliphezulu. Ubaxter ufake uhlompho Kekana endaweni kajali waphinde wachibiyela ngolebogang Manyama endaweni kavilakazi wase egcina ngokukhipha utau indawo yakhe yathathwa ngudino Ndlovu.