UBALISA NGOKUXAKEKA UKHULUBUSE ZUMA
Uthi ubhace khona kuleli
UYABALISA umnu Khulubuse Zuma oyindodana yomfowabo kamengameli Jacob Zuma othi izinto kazimhambeli kahle, okungenye yezinto ezenze wangakwazi ukuqhubeka nokukhokha u-r500 000 ngenyanga, ngokomyalelo wenkantolo enkulu yasenorth Gauteng.
Emuva kokuba ILANGA elingunina WELANGA Langesonto libike ngolwesine ukuthi kunezinsolo zokuthi umnu Zuma useshaye utshani wayobhaca e-united Arab Emirates (UAE) - ebalekela isikweletu - leli phephandaba likwazile ukuxhumana naye wathi kungamampunge ukuthi usehobe E-UAE - ukhona lapha lwelikamthaniya.
Umnu Zuma uyeke ukukhokha le mali ngontulikazi (July), esakhokhe u-r 9.5 million - isiyonke okufanele ayikhiphe, wu-r23 million.
Le nkece kumele ayikhokhe yena nabebambisene nabo njengabaqondisi be-aurora Empowerment Systems okuyinkampani ehlakaziwe ngomfumfu (October) wezi-2011 emuva kokuba ishiye imayini ipamodzi Gold ese-east Rand nase-orkney egoli ingenamali.
Ubebambisene nomnu Zondwa Mandela ongumzukulu kamnu Nelson Mandela, umnu Thulani Ngubane, umnu Fazel Bhana nomnu Solly Bhana, bona abasaqhubeka nokukhokha. Badale “umonakalo” olinganiselwa ku-r1.7 billion kule mayini.
Emuva kokuba umnu Zuma eyekile ukukhokha, isolidarity okuyinyunyana yezisebenzi ebinamalunga kulezi zimayini ezigingqwe yilaba baqondisi, ithi ibilokhu izama ukuxhumana naye kodwa imizamo yayo iphelele eboyeni okwezithukuthuku zengcanga.
Ethintwa yileli phephandaba umnu Zuma, uthe: “Izinto kazingihambeli kahle, uma usebhizinisini kakuhlale kukhanya njalo, kubuye kube mnyama. Baqinisile impela uma bethi ngigcine ukukhokha ngontulikazi, kodwa kungamanga ukuthi bengibalekile.
"Ngikhona ngilapha engihlala khona emhlanga, indoda yomzulu ingabaleka kubo iyobhaca emazweni engawazi ko-arab, bekungeke kwenzeke lokho. Imali kangiyikhokhonga ngoba ngingenayo. Icala leli abathi kumele ngiye kulona ngozibandlela (December), kangiphiki ngizoya kulona.
"Mazikhohlwe lezo zisebenzi, ngeke zisayithola imali yazo, into okumele ngabe bayayenza wukuthi bakhulume nami banginike ithuba lokuthi ngizame ngenye indlela.
"Imali ngingase ngibe nayo ngonyaka ozayo ngiqhubeke nokukhokha. Into engiyibonayo la, ngishawela ukuba ngowakwazuma. Nale mali okuthiwa mangiyikhokhe, umaster of High Court wangikhipha phambili wathi kangihlangene nokwenzeke e-aurora ngoba bengingusihlalo ongasebenzi ngqo nenkampani (non executive chairman).
"Le nto yase-aurora isingilahlekisele ngemisebenzi eminingi kabi ngoba emuva kokuba ngilokhu ngibhalwa, nginekwa emaphepheni, kabekho osomabhizinisi abasafuna ukusebenzisana nami.
"Ngikhuluma nje, ngilahlekelwe wumsebenzi omkhulukazi wokuthutha uwoyela edemocratic Republic of Congo, ngaphuthelwa wumsebenzi wokwakha amaloli nowokufaka imikhumbi enefulegi laseningizimu Afrika echwebeni lakuleli.
Kulo msebenzi besekusele ukuba kusayinwe, mina ngizothenga imikhumbi emibili abangani bami basechina bathenge emithathu, siqale ukusebenza kodwa lo msebenzi ugcine ungasaphasanga ngenxa yale nto yase-aurora,” kusho umnu Zuma.
"Uthi uma efakwa enkantolo uyophoqeleka ukuba azimele ngoba imali yokukhokhela abameli akanayo.
“Nakuba ngixakekile okwamanje, nginethemba lokuthi ngizovuka ngoba kangikho mpofu engqodweni, kuningi engikuzamayo ukuze ngiphumelele.
"Inkinga ngalaba bantu bazitshela ukuthi njengoba ngingowakwazuma nje, kuningi engikuthola kumengameli Zuma, ekubeni kungenjalo. Ezintweni zonke enginazo, kakukho nakukodwa engikuthole ngenxa yakhe. Ngiyazizamela, kawukho nowodwa umsebenzi engike ngawenza nohulumeni kule minyaka edlulile,” kusho umnu Zuma.
Unobhala-jikelele wesolidarity, umnu Gideon Du Plessis, uthi naye umthintile umnu Zuma ngo-lwesine ebusuku ezikhalela ethi akanamali.
“Okubuhlungu ukhala kangaka ngokuthi akanamali nje, kunezisebenzi eziyizi-5 300 ezilahlekelwe wumsebenzi enkampanini i-aurora, okumanje zibhuqabhuqwa yindlala.
"Yena ulokhu ezibambisa udonga ngemali okufanele ngabe ziyayithola njengesinxephezelo. Sizoyilwa le mpi kuze kube sekugcineni ukuze kwenzeke ubulungiswa ezisebenzini ezihlukumezekile,” kusho umnu Du Plessis.
Icala likamnu Zuma osekhala ngobunzima bendlela esuka kwinkinsela yasemgungundlovu, ibheke ekubeni nguphuya wasemshwathi, kulindeleke ukuba lingene mhla ziyisi-8 kuzibandlela (December) nonyaka. Lifakwe ngabajutshwe ukudla impahla ngoba bengasamtholi umnu Zuma uma bemfuna.