Usinde ngokulambisa edutshulwa usomabhizinisi
USINDE ngokulambisa usomabhizinisi wasethekwini ngesikhathi kusuka uthuli lwezichwe endaweni yakhe kanokusho yezivakashi IB&B esela Lucia, entshonalanga yetheku ngolwesihlanu ebusuku.
Kubikwa ukuthi izigebengu zigasele kuleb&b izisebenzi zikanto Majozi (usomabhizinisi) zimatasa zilungiselela umcimbi obuzoba izolo ngomgqibelo emini.
Kubikwa ukuthi kutheleke izinsizwa ezibalelwa kwezine zabamba izisebenzi zazilalisa phansi, zawola impahla. Ngesikhathi ILANGA
Langesonto lifika kule B&B izolo ekuseni lifice esinye sezisebenzi ebezikhona ngesikhathi kwenzeka lesi sigameko.
Silandisa leli phephandaba ngokwenzekile lesi sisebenzi sithi: “Ngezikhathi zokugamanxa kwehora lesi-8 ebusuku ngithe ngikwelinye lamagumbi ngabona izinsizwa ezimbili ziqonda kumina zingikhombe ngesibhamu, ngabaleka ngayocasha, zangilandela zangithola lapho bengicashe khona. Zingithathile sinozakwethu ababili zasimboza ngeduvethi yombhede zathi singalinge sinyakaze. Ukwazile ukuphunyula oyedwa wabaleka wayobiza unto emzini wakhe ngoba kwakhelene neb&b. Unto utheleke ngejeep yakhe ethi uzobavimba esangweni kanti akabuzanga elangeni - bavele badubula bebhekise kuyena. Izinhlamvu ezine zingene emotweni ngaphambili kwanqamuka ipayipi lamanzi, ezinye zan- gena emzimbeni wemoto. Naye wehle wayishiya kanjalo, zaphuma igebengu zabaleka,” kulanda lesi sisebenzi leli phephandaba elinalo igama laso.
Kubikwa ukuthi kwenzeka konke lokhu nje izivakashi bezikhona ngaphakathi emagunjini azo.
“Ezinye (izivakashi) zizwile zaze zavuka. Sezibaleka igebengu ziphume ngezintuba ezehlukene nokudale ukuba zidukelane,
kwasala nocingo lwazo okungaqondakali noma ziluwise ngamabomu noma bezidukisa umkhondo. Kule foni etholakele kuvela izinombolo zabaculi abadumile basethekweni,” kulanda isisebenzi.
Ngokuthola kwaleli phephandaba, lezi zigebengu ziphakamise isango saligudluza emzileni walo, zase zikwazi ukulivula zangena.
Leli phephandaba liphinde laxhumana naye lo somabhizinisi, nebala waziqinisekisa lezi zindaba. Ushaye ngamafuphi wathi: “Impela kuhlaseliwe EB&B izolo (Lwesihlanu), kwantshontshwa amatv ohlobo lwesumsung 65 cm, kodwa okuningi ngizocela ukuthole emaphoyiseni kube yiwo azokhuluma ngoba icala livuliwe.
Okhulumela amaphoyisa Kwazulu-natal ukapt Nqobile Gwala ukuqinisekisile ukuthi likhona icala eliphenywa ngamaphoyisa asedurban North elimayelana nokubanjwa kwenkunzi ebhizinisini elisela Lucia. Ukuqinisekisile nokuthi omabonakude ababili abebebiwe batholakale beshiyiwe khona endaweni. Uphenyo luyaqhubeka.