Gqoka ngendlela efanele kuleli hlobo
UKUNGENA kwentwasahlobo kusho ukuvela kwalo lonke uhlobo lwemikhuba yezemfashini ongakaze ulucabanga! Phela ngalesi sikhathi amazinga okushisa asuke eseqala ukuphakama, cishe wonke umuntu efuna ukushaywa umoya.
Kodwa-ke akusibo bonke abantu abaziyo ukuthi iyiphi indlela ekahle yokugqoka ngendlela efanele ushaywe wumoya.
Ngokujwayelekile kuye kugxekwe abesifazane ngokugqoka okufishane kakhulu nokungahambelani nemizimba yabo, kodwa-ke okuqaphelekayo wukuthi nabesilisa baye bashaye eceleni ngezinye izikhathi, ubathola bepepenyeka ngamavesti aveza isisu, abanye begqoke izikibha ezinwebeke zaze zacishe zashaya emadolweni.
Angisakuphathi-ke okokuzinakekela kusuka ekuqinisekiseni ukuthi izinyawo zinuka ngendlela efanele kuya ekushefeni amakhwapha.
Eqinisweni uma kungena intwasahlobo wonke umuntu kumele ashintshe ukwenza kodwa ngendlela okuyiyo.
Ake sibheke eminye yemikhuba okumele uqhelelane nayo uma ungowesilisa.
IZIBUKO ZELANGA EZINGAKULINGANI
Gwema ukugqoka izibuko ezithi ne ebusweni, ezixegayo noma ezinkulu kakhulu. Yize izibuko kuyinto yokuzigqokela ngoba uvikela ilanga kodwa zidlala indima enkulu ekubeni okugqokile kubukeke kahle. Izibuko ezingahlali kahle qhelelana nazo, thola ezikulingana ngendlela eyiyo.
INDWANGU ESINDAYO
Kunabantu abathi uma bethanda impahla bese belokhu beyibelesele njalo ngisho nangezikhathi ezingafanele.
Kasikho isidingo sokuba uziphihle ngejezi ngoba nakhu ulithanda noma likufanela. Mhlawumbe unehembe le- flannel onconywa njalo mawuligqokile kodwa-ke uma sekushisa ligweme ngoba wenza nabaseduze kwakho bashiselwe. Zama ukugqoka elilula ledenim noma-ke elifishane elihlotshisiwe.
UKUGQOKA AMASOKISI UVEZE AMAQAKALA AMHLOPHE
Ngalesi sikhathi sonyaka amadoda ejwayele ukubuyela esitayeleni samabhulukwe aveza amaqakala bese engawagqoki amasokisi.
Ukuze ubukeke mawulandela lolu hlobo lokugqoka, gcoba amaqakala.
Isikhumba esimhlophe esomile asibukeki kahle. Ungakhohlwa ukufaka u- powder wezinyawo ezicathulweni. Kuyaphoxa ukuba umuntu ethi ekhumula izicathulo bese kuba nephunga eliqulekisa impukane.
UKUGQOKA AMA-SANDAL NAMASOKISI
Ngisho kungabe uzitshela ukuthi usemfashinini kangakanani, uma ugqoka ama- sandal namasokisi usuke uyilahle wayiqeda. Akudingi ukuba uze ube nezinyawo ezinhle, uma izinzipho zinqunyiwe nengqakala ichoshiwe nakanjani ungawagqoka ama- sa
ndal. Ukugqoka ama- sandal namasokisi kukwenza ubukeke uyinyoni yokuqala neyokugcina, akekho ongakhuluma nawe into ephusile ugqoke ngaleyo ndlela.
ISIKHINDI ESIFUSHANE KAKHULU
Uma ungowesilisa ugqoke isikhindi kumele sibe ngenhla kancane kwamadolo.
Uma ugqoka esingezansi kwamadolo uzobukeka sengathi uphila esikhathini sakho wedwa. Gqoka i- short ekufanelayo ezokwenza ubukeke.