GQOKA ISUDI EKUFANELAYO
KUTHIWA uma ungalandela imfashini ungagcina usuzithola umpampatheka ngoba ishintsha njalo. Kuyaziwa ukuthi imfashini inabantu bayo, abanye abayilandeli.
Nakuba ungeyena umuntu olandela imfashini kodwa kunezinto ezisobala futhi ezisemqoka wonke umuntu okufanele azibheke noma azazi.
Phela kubi ukubonakala ugqoke waphuma eceleni kuhle kukajosaka.
Kuyinto eyaziwayo ukuthi iningi lamadoda lisizwa ngabesifazane uma kuza kwezemfashini kanti abanye kabatshelwa, bayazi njengoba bezazi
imfashi- ni. Uma uyinsizwa ezithandayo nawa amanye amathiphu okumele uwalandele, ukuze ubukeke njengegcokama.
UKUFASA ISUDI
Uma ijacket yesudi yakho inezinkinobho ezimbili noma ezingaphezu kwalokho, le engasekugcineni kakumele ifaswe. Lokhu kwenza isudi yakho ibukeke kahle, ngaphezu kwalokho kusiza ekutheni uma uhleli phansi ingaqhumi.
IBHULUKWE ELIDE KAKHULU
Uma ibhulukwe lakho limboza uhhafu wesicathulo futhi lihuba phansi mawuhamba, udinga ukuhlukana nalelo bhulukwe noma uthole umthungi ozokusiza aliphethe.
Uma kumele ibhulukwe lithinte isicathulo kakumele lize lifike ezintanjeni zokubopha izicathulo.
Uma ungumuntu othanda isitayela sokuveza amaqakala ukuligoqa ibhulukwe kungasiza.
UKUXEGWA YIZIMPAHLA
Mhlawumbe ungazitshela ukuthi ukugqoka izimpahla ezinkulu kukwazi ukufihla izindawo ongakhululekile ngazo.
Eqinisweni zikwenza ubukeke umkhulu kakhulu bese kuba kubi sengathi uyinukwana.
UBUDE BUKATHAYI
Uma ugqoke uthayi qinisekisa ukuthi uba ngenhla kwebhande hhayi ngaphansi kwalokho. Uthayi omude kakhulu noma omfushane kakhulu kawubukeki kahle futhi nawe ukwenza ungabukeki kahle noma ngabe isudi yinhle kanjani.
UKUGQOKA IZIMPAHLA EZIKUBAMBA NSI
Yize ama-slim fit esesitayeleni futhi emahle kodwa abanye besilisa bagqoka okubamba ngokwedlulele.
Inhloso yohlobo lwezimpahla eziyi-slim fit wukukwenza ubukeke kahle, kodwa akufuneki bese kukubamba uze uhluleke wukuphefumula.
Uma wehluleka wukufaka umunwe esihlakaleni sehembe lakho, lokho kusho ukuthi lincane kakhulu.