Izinyathelo ezinqala kwabalala emsebenzini
IYADUMAZA indaba yezisebenzi ezithi ziqashelwe ukuba zisize umphakathi kodwa bese zehluleka wukusebenza ngokuzimisela.
Imvamisa kuye kukhalwe ngezisebenzi zikahulumeni ezisebenzela ezikhungweni zomphakathi ngokuthi yizo ezingawenzi umsebenzi wazo ngendlela elindeleke kuzo.
Kuye kukhalwe ngokuthi aziwunaki umphakathi, ziyaqhenya futhi azikhuthele neze ekwenzeni umsebenzi.
Kamuva nje uphiko lwezokuphepha eningizimu Afrika isouth African Police Service (SAPS) lusematheni, kulandela ukusabalala kwe-video yephoyisa elisolwa ngokuthi belimatasa lihleli ocingweni, lilungisa indaba ye-dstv yalo, langayingena eyokusiza umphakathi obulindile esiteshini ufuna usizo. Kuthe kusakhulunywa ngaleyo video ngapha nangapha, kwavela enye futhi yephoyisa elibonakala lihuqa ubuthongo lisemsebenzini.
Lokhu kuwuphoxa kakhulu umbutho WESAPS - kusenza sizibuze ukuthi hlobo luni lwephoyisa olulala emsebenzini nokuthi hloboluni lwephoyisa elingakhathalele ukusiza umphakathi.
Uma iphoyisa lehluleka wukusiza umphakathi lizokwenza msebenzi muntu ngoba phela umsebenzi walo yikho ukusiza umphakathi.
Lawa ma-video akamuva akhomba ngokusobala ukuthi inkulu inkinga izwe elibhekene nayo yabantu abangawuhloniphi umsebenzi.
Kuyadabukisa-ke ukuthi esikhathini esiphila kuso kukhona abantu abangawuhloniphi umsebenzi ngale ndlela. Akekho umuntu ongazi ukuthi isimo somnotho asisihle neze. Lokhu kungabi kuhle kwesimo somnotho kuhambisana nokuswelekwa kwamathuba emisebenzi ngendlela emangalisayo. Indlela imisebenzi emfimfa ngayo kufanele engabe zonke izisebenzi ziwubambise okwezikhali zamantungwa umsebenzi eziwenzayo.
Nokho iqiniso wukuthi akuzona izisebenzi zikahulumeni kuphela ezingawenzi ngendlela futhi ezingawuhloniphi umsebenzi wazo - nasezinkampaneni ezizimele zikhona izisebenzi ezingawuhloniphi umsebenzi.
Lolu hlobo lwezisebenzi ezilala emsebenzini kufanele luthathelwe izinyathelo ezinqala ngoba kusho ukuthi zigweve nezikhala zomsebenzi, zivalele abantu abalambele amathuba futhi abangawenza kangcono nangokuzikhandla umsebenzi.
Kufanele siqine isitilobho, zonke izisebenzi ezihuqa ubuthongo zivune ezikutshalile. Siyawancoma namalunga omphakathi angathuli uma ebona izinto ezingalungile, kodwa asukumela phezulu azibike. Kuyilungelo lawo umphakathi ukuthi uma ufika kulezi zikhungo okufanele usizakale kuzo unakwe.