LIPHINDE LAHLEHLA ELIKAMBHISHOBHI UMVUBU
SEBEMBIZA ngophunyukabemphethe umbhishobhi Jabulani Mvubu wasemzinto emuva kokuba inkantolo yamacala obugebengu obuhleliwe ethekwini iphinde yahlehlisa ukubuyekezwa kwesigwebo sakhe ngomsombuluko.
Umbhishobhi Mvubu walahlwa wuhide lwamacala okukhwabanisa angama-574 ngenyanga kantulikazi wagwetshwa isigwebo esiyindida yimantshi esimnkantshu- bomvu unkz Christo Mazibuko, kushushisa unkz Hazel Siraramen. Ugwetshwe amahora ayizi7000 azowadonsa njalo ngezimpelasonto ejele, kuthi ngemisombuluko kuya kolwesihlanu abe ngokhululekile.
Kwathiwa akakhokhe isamba semali engama-r20 000 kusukela mhla ziyisi-7 kuntulikazi, bese emuva kwalokho akhokhe isamba semali engamar25 000 yezisulu njalo ngenyanga .
Izisulu zizokhokhelwa ngokulandelana kwazo ohlwini.
Akasiqalanga ngisho nokuqala isigwebo sakhe umbhishobhi Mvubu ngoba iziphathimandla zejele zakhala ngokuthi asicacile, akabange esayikhokha kwaleyo mali yize afika eyiphethe ngesijumbane ezokhokha enkantolo kwathiwa kumele abuyele enkantolo azogwetshwa kabusha mhla ziyi-13 kumfumfu (October) nakhona lapho lihlehlile ngezizathu ezingacacanga lahlehliselwa umsombuluko esisuka kuwo umhla ziyi-16 kwephezulu laphinde lahlehliswa futhi selihlehliselwa umhla zingama 22 kulwezi (November) nonyaka.
Izisulu zikambhishobhi Mvubu bezisho zingananazi ukuthi unguphunyuka bemphethe zize zithi ngisho nangesikhathi esaziheha ukuba zijoyine uhlelo lwakhe abelubiza nge-zuza 4 Life ubenolimi olumnandi.
Phela ubezethembise ukuthi uma zikwaze ukwakha amaqoqwana (Corporation) abantu abayisihlanu zikhokha imali engama-r2 500 umuntu emunye zizozuza isamba semali engamar15 million zisungule amabhizinisi.
Konke lokho akwenzekanga kwagcina ngokuba zimkhalele umbhishobhi walala ebaliwe ejele lasemzinto.
Okuxakayo wukuthi nanxa eselahlwe ngamacala waze wagwetshwa kukhona abasamlandela ngethemba lokuthi bazozuza.