Bezimshiya izintombi esahlupheka
USENGUSOZIGIDI usomabhizinisi owe ephindelela izikhawu ezili-17 izinto zimbhedela elahlwa nayizintombi nabangani abebathembile.
Le mpunyela encane ngesidumbu kepha enamandla ngasephaketheni, siyifice emcimbini wokuphiwa kwezihlalo ezinamasondo kwalabo abangakwazi ukuzihambela obusehluhluwe enyakatho yekwazulu-natal uholwa yisilo samabandla ugoodwill Zwelithini kabhekuzulu ngolwesine olwedlule.
Sikhuluma ngomnu Jacob Charles Mnisi wasewitbank, Emalahleni, esifundeni sasempumalanga. Siyicele ukuba siphole nayo le nsizwa ayinginikanga nkinga yize ibimatasa ize kulo mcimbi, kwazise yiyona ebilule isandla ihambisana nomngani wayo ongumelaphi wendabuko, uthulani "3seconds" Nkwanyana wasemevamhlophe, empangeni, enyakatho-mpumalanga yekwaZulu-natal.
“Ngihlala ngimatasa kepha singakhuluma ngoba vele ngibhale incwadi ngomlando wami engicabanga ukuthi uzoba wusizo kwabanye abantu ukuze bazi ukuthi indlela eya empumelelweni kayilula,” kusho umnisi.
Uzalwa ngumnu Enos Mnisi ongasekho kunina unkk Violet Mnisi uyizibulo labo bobabili. Uzalwe mhla zimbili kulwezi (November) ngowe-1967. Ufunde amabanga aphansi evuma Primary School.
"Ngithe sengifunda ustandard 5 ngashiya isikole phakathi ngamaholide kanhlangulana (June) ngenxa yesimo senhlupheko ekhaya. Nakuba ngize ngafinyelela kuwona U-STD 5 yingoba vele bengilokhu ngiziqhuba ngokudayisa amaswidi esikoleni.
"Kuhambe isikhathi ngathenga ikhamera yohlobo lwekodak ngishutha izithombe esikoleni, kube nzima ukuziwasha ngibe sengintshontsha imali kababekazi wami obenguthisha kasontosikole ngasheshe ngayibuyisa lungakafiki usuku lwesonto,” kusho yena.
Uthi uphume esikoleni wasiza umalume wakhe umnu Pickup Mayimela wafunda ukukhanda izimoto wawubona umehluko empilweni, wakwazi nokuphinde athenge izinto zokwakha izindlu azidayise wagcina esethenga nama-alamu asezindlini lawo okuthi uma umuntu engena emnyango akhale amcebe.
“Ngeke ngigeqe amagula ngoba okuningi kusencwadini engiyibhalile esihloko sithi “17-12” lapha ngilanda ngemininingwane yezehlo ezazingehlela ezinye okungelula ukuba abantu bazikholwe. U-17-12 umele izikhawu ezili-17 ngiwa ngivuka eminyakeni eli-12. Kafushane nje nginezingane ezili-11 eziyisi-9 zinonina bazo ngamunye oyedwa kulabonina bezingane zami wathola ezimbili.
"Hheyi ndoda kunzima emhlabeni bekungathi ngibulewe ngoba kulabo nina bezingane zami esengibashilo bekuthi njalo uma sengingenayo imali bangishiye. Bese ngazi ukuthi noma singathandana kanjani nonina wengane kepha uma esebona ukuthi sengihlwempu uzongilaxaza. Cabanga-ke ukuthi abesifazane abayisi-9 bonke benze into efanayo.
"Lapho ngilahle khona ithemba kungesikhathi-ke sengithandana nomculi umshoza mina ebengimbiza ngomichael Jackson. Yena uhlalile nokho ngoba sibe nezingane ezimbili kepha naye ngithe uma sengisezinkingeni kwasuka lokho,” kubeka umfoka Mnisi ehleka. Umnisi uqhubeka athi emuva kokuhlukana nomshoza wenzele osomabhizinisi abayisithupha imali eyizigidi zamarandi kepha kuthe uma yena esesezinkingeni ebacela ukuba bamsize banyamalala.
“Ngize ngasimama ngonyaka wezi-2016 lapho kubuye khona amandla zavuleka izinto angazi noma yingoba ngibuye ngahlangana nomngani wami yini u-3seconds esasidlala naye isibhakela kudala,” kubeka yena.
Uke waba ngumdlali wesibhakela esingakhokhelwa ngaphansi kukanorman Hlabane obengumqeqeshi nokuyilapho wahlangana khona nomngani wakhe, u-3second.
Uthi lapho babe nethuba lokuba sesitebeleni sikadingaan Thobela oke waba ngumpetha womhlaba esibhakeleni. Mayelana nesimo sakhe somndeni uthi uzimisele ngoku- shadelwa kepha ufuna isithembu futhi akazimisele ngokuthatha noyedwa konina bezingane zakhe ngoba kusobala babefuna anakho bebengamthandi. Uhlele isiphihli sedili losuku lwakhe lokuzalwa mhla zimbili kulwezi (November) endaweni yabadla izambane likapondo, emelrose Ark, egoli lapho kuzobe kukhona izikhulu nosaziwayo futhi kuzobe kungenwa ngezimemo. Uzobe eqondanise nokwethulwa kwale ncwadi yakhe athe iqukethe konke okungempilo yakhe.