Masimbonge ujehova silala noma sivuka
KUYE kwenzeke uzibuze ukuthi kumthathani unkulunkulu ukukuvusa ekuseni, nokukugcina usuku lonke uphila, noma uye ucabange nje ukuthi sekuyinto ezenzekalelayo leyo?
Uke ucabange nje ukuthi kulaba bantu abaningi kangaka abakhona emhlabeni, yini eyenza ukuba wena wedwa nje, kwabaningi, ubaluleke kangaka kuthixo?
Mina njalo uma ngivuka ekuseni, ngiyaye ngibonge ithuba lokuphila uthixo angiphe lona, ukuthi ngikwazi ukuvuka futhi ngiqhubeke nezinto ebengizibekele zona osukwini olusha.
Ngimbonga unkulunkulu ngoba kusuke kungenzekanga ngokuhlakanipha nokuqonda kwami, noma ngokuzikhethela kwami.
Lokhu kungenza njalo ngibone isidingo sisikhulu kimina sokwenza okungcono usuku nosuku, ukuze ngingabi odumazayo emehlweni kathixo.
Into eyenza ngiqale ngalawa mazwi wukuthi kaningi siyaye singanaki ukuthi ukuvuka asizenzelanga khona, nokuthi umphefumulo nje uwodwa uhlangene nenyama, kukunika ithuba lokuqhubeka uphile, ufeze amaphupho nemibono yakho emihle. Kubalulekile ukuba sazi ngokucacile ukuthi yini esiphilela ukuyifezekisa emhlabeni.
Lokho kusenza sikwazi ukubonga kumdali ngokusinika isipho esikhetheke njengesipho sempilo.
Inkosi udavide eyaziwa njengomunye owenzelwa umusa okhethekileyo ngusimakade, njengoba yayizalwa ikhehla elingujese, futhi ikhula ingumfana owayengayazi intokomalo yakubo, ngoba uyise wayeyivusa ayikhombe ekwaluseni imihla yonke, nokwakwenza ukufunda kwayo okuningi kube okwasezinkomeni nezimvu lezi eyayizelusa, sithola-ke ukuthi yayingumuntu-ke obhale kakhulu amahubo, njengoba sazi ukuthi ebhayibhelini, le ncwadi ingenye yezinde kakhulu, empeleni inde kunazo zonke.
Kulawa mahubo, udavide ubonga ujehova njengomelusi omuhle nowethembekile, uthi-ke noma ehamba esigodini sethunzi lokufa, akakwesabi okubi ngoba ujehova uhamba naye imihla yonke.
Umlando wokubhalwa kwebhayibheli, kuveza ukuthi le ndoda njengoba ithi ibonga unkulunkulu nje, futhi ithi ayiyukwesaba lutho noma ihamba esigodini sokufa, kwakungoba yayimbonile uthixo eyihlenga kwizilo zasehlane ezazimhlasela ekwaluseni kwakhe.
Ukuhuba kwale ndoda, kufikisela izinyembezi uma umlandela kahle, nokukhona lapho kumahubo 139:5, simuzwa ethi khona "Ungizungezile ngasemuva nangaphambili, wabeka isandla sakho phezu kwami", uyaqhubeka athi "Uyangihlolisisa, uyangazi, ukuhlala nokuvuka kwami uyakwazi". Lawa mazwi kadavide ayisidingo esimangalisayo ezimpilweni zethu, ukuba sizikhumbuze wona, bese simbonga unkulunkulu.
Ngifisa ukuthi kuwena, vula eyakho ingqondo, wazi ukuthi okwakho ukuhlakanipha kukodwa akusoze kwakufikisa ndawo.
Khumbula ukuthi ngisho ungaziwa njengohlakaniphe kanjani, kodwa uma ungakwazi ukubona isipho esiyimpilo yakho, njengesipho esiyigugu nesikhethekile, futhi osiphiwe ngomusa, usenenkinga.
Inselelo enkulu esinayo ekuphileni kwethu, ukuzithanda njengabantu abadalwe ngokukhethekile, bese sikwenza futhi lokho nakwabanye abantu, ngenxa yokuthi akukho ukuphila uma abanye abantu bengekho ekuphileni kwakho. Ukuhlonipha, ukunakekela nokusimamisa ubudlelwano bakho nabanye abantu abadalwe uthixo, kwenza ukuba angakulibali esabelweni somusa wakhe, ukuze nawe usho njengodavide, umbabaze imihla yonke ngokukupha lempilo nalaba bantu akwenze waphila ngesikhathi sabo.