UZIMISELE UKUSIZA INTSHA OWOZALO
ISILOMO somdlalo owuchungechunge okhonjiswa KWI-SABC 1 Uzalo, sihlangane namapantsula akudala ngenhloso yokuthuthukisa umphakathi ezindaweni ezahlukene ezakhele idolobha ivryheid.
Usifiso Simamane odlala indawo kakaputeni kulo mdlalo ohamba phambili emzansi uthi uzizwa ehloniphekile ukusebenzisana nala mapantsula asekhulile ngenhloso yokusiza umphakathi ikakhulukazi abantu abasha.
Uthi esikhathini esiningi labo abaqhelelene namadolobha amakhulu bavamise ukushaywa indiva uma sekushaya lesi sikhathi.
“Ukusiza nokuthuthukisa abantu abasha yinto esenhliziyweni yami ngakho uma kunento ebhekene ngqo nayo ngiyaqinisekisa ukuthi ngiyazinikela ngoba ikusasa laleli lizwe lisezandleni zabantu abasha,” kusho lo mlingisi oseke wabonakala nakweminye imidlalo kumabonakude. Uqhuba ngokuthi sebeqalile uku- hambela izikole, izibhedlela namajele ngenhloso yokuphosa esivivaneni.
“Njengoba abafundi sebezoqala ukubhala izivivinyo sesiqalile ukubahambela sibakhuthaze ukuba bazimisele kakhulu manje. Injabulo iyeza kanti kubamnandi kakhulu uma nemiphumela imihle,” eqhuba.
Usimamane unanela ngokuthi kuhle ukubona abantu asebekhulile bezinikela ekuthuthukiseni intsha.
“La mapantsula anomlando ongakwazi ukusiza intsha njengoba nawo edlulile esikhathini sokuba ngabantu abasha,” enanela ngokubonga usomabhizinisi usipho Masondo ongumnikazi wendawo yobumandi kule ndawo ebizwe ngokuthi Engadini.
Uthi la mapantsula asekhulile ngokweminyaka abalelwa ku-12 kanti amanye awo aphuma eminyakeni engaphakathi ejele kodwa aseyiguqulile impilo yawo.
lucky.cain@ilanganews. co.za