EZABESIFAZANE:
UZOBE ushaya ngelinye igiya umcimbi wabesifazane oba minyaka yonke owenziwa yinhlangano engenzi nzuzo izommnotho Community Development NPO, eholwa ngunkz Nqobile Cele.
Lo mcimbi uzokwehluka kakhulu kulo nyaka kunokujwayelekile njengoba uzobe uyizigaba ezimbili. Ngokusho kukankz Cele, lo mcimbi uzoqala ngesigaba sasekuseni lapho kuzobe kucotshelelwana khona ngolwazi kwabesifazane.
Uthi kusukela ngehora lesi-9 kuya kuya kwelesi-3 ntambama, kuzobe kunikwa ithuba izihambeli ikakhulukazi intsha yesifazane enothando lokuthuthuka emkhakheni wezamabhizinisi noma emkhakheni wezobuciko ikwazi ukuthola ulwazi olwehlukene ngalokho.
“Lapha sikhuluma ngabathanda ukubhala izincwadi, abafisa ukukhula emkhakheni wezemfashini kanye nabafisa ukukhula badlondlobale emabhizinisini ehlukene.
“Kulesi sigaba sokuqala sizobe sinabantu abehlukene abazobe bezosichushisa njengabantu besifazane abanothando lokukhula kule mikhakha ukuthi yini abayidingayo ukufinyelela lapho.
“Kunabesifazane abanawo amabhizinisi kodwa abangawabhalisile nokwenza kube nzima uma sebefuna uxhaso noma usizo ezinhlakeni ezithile. Lapha bazofundiswa baphinde bachushiswe ukuthi uma befuna ukuhlomula ngoxhaso eminyangweni eyehlukene kumele benze kanjani nokuthi iyiphi imigudu okumele bayila- ndele,” kulanda unkz Cele.
Uqhuba athi lapha bazophinde banike nabasiki bengqephu ithuba lokukhangisa nokudayisa ngezimpahla zabo njengoba bezophinde babe nepop-up Shop khona lapha.
Konke lokhu kuzokwenzeka ehhotela eliphambili emargate eningizimu nogu ngaphandle kwePort Sheptsone mhla ziyi-21 kuLwezi kusukela ngelesi-9 ekuseni kuze kushaye elesi-3 ntambama. Uthi kulo mcimbi wasekuseni kungenwa mahhala.
Ntambama kuzobe sekuba nomcimbi wokunikezelwa kwezindondo kwabesifazane abenza kahle emikhakheni eyehlukene nabangathathwa njengesibonelo esihle entsheni.
Phakathi kwemikhakha okuzobe kuklonyeliswa kuyona abesifazane ubalule umkhakha obizwa ngeDaughters of the Soil, okuwumkhakha athe kuzobe kuklonyeliswa kuwona labo abazibandakanye ekusebenzeleni umphakathi ngokuzinikela.
“Miningi imikhakha esizonikezela kuyona imiklomelo nokuhlonipha abesifazane abenza kahle emikhakheni eyehlukene abakuyona. Laba besifazane sibathatha njengabesifazane abantu abasha baseningizimu yonkana abangabukela kubona ngoba bayisibonelo esihle,” kusho unkz Cele.
Eminye imikhakha yi-emerging Female Entreprenuer Award, In a Class of their own, Women in Media Professionals, Hall of Fame, Young Female Game Changer neminye.
Kulo mcimbi wasebusuku ingqikithi yayo ibizwa ngokuthi Its a Monocrome, lapho izicuku- thwane ezizobe ziwuhambele zinxuswa ukuba zigqoke imibala emhlophe nemnyama njengoba ngisho zingena zizobe zihamba kukhaphethi omnyama.
“Njengoba sazi ukuthi abantu besifazane bayazifela nangokubukeka kahle, sicela ukuba balandele ingqikithi lena esiyikhethile. Bazophinde bathole nethuba lokuthatha izithombe beswenke beconsa ngaphambi kokuqala komcimbi.
Isikhulumi sosuku kuzobe kungunkz Thandi Mahambehlala ongusekela Ngqongoshe wezokuXhumana kuzwelonke,” kuphetha unkz Cele.
Lapha sikhuluma ngabathanda ukubhala izinncwadi, abafisa ukukhula emkhakheni wezemfashini kanye nabafisa ukukhula badlondlobale emabhizinisini ehlukene...