Uzah Moloi uzobamba kancane kwi-opw
KUNEZINTO noma imidlalo kamabonakude oyibuka ikushiye uvale amehlo kube nguwe ongumbukeli ofisa umhlaba uvuleke bese uyacasha. Kule ngosi yilapho sivulana amehlo noma sihlaziyo izinto eziningi ezenzeka kumabonakude, okunye nami kungishiya ngingazi noma ngibhale ngakho noma ngivele ngikushiye kulenga.
Kulokhu ngeke ngikwazi ukuyiziba lena, kukaningi osomahlaya behlekisa ngohlelo olubizwa "utatakho" olukhonjiswa kumzansi Magic (161), olwethulwa ngunimrod Nkosi.
Okungenza ngingalunaki kakhulu wukuthi namanje bengisakhala ngokuthanda ukuhlekisa ngezimfihlo zemindeni yethu siyindlu ensundu, kangiqondi ukuthi ngabe ukusungula lolu hlelo bekuyini inhloso kubaqophi nabahleli balo kodwa manje cha impela selwedlulele futhi luya ngokuya lusishiya singababukeli sizibuza ukuthi ngabe kanti siwuhlobo olunjani lwabantu. Kulokhu ngifuna ukukhuluma kakhulu ngohlelo olwedlule lapho bekukhona umama umfundisi obebizwa ngonina kasamkelo.
Lo mama ubesefihlele ingane yakhe ngoyise iminyaka eminingi impela, ngaphandle nje kokungena kakhulu odabeni lwabo, okungishiye ngishaqekile kakhulu wukuthi umuntu omdala kangaka agcizelele kumabonakude obukwa yizinkumbi zabantu, athi yena akathandananga nalo mlisa kodwa bagcina ngokuxoxa nje kuphela.
Gwiqiqi ekupheleni kohlelo lo mlisa axoxa naye ungubaba wengane. Kanjani? Kule ngosi ngithanda nje sibheke izinto ekutheni make siyeke ukuzenza inhlekisa sizibukanise nezwe bantu bakithi, ngiyolokhu ngikhale njalo ngo- kuthi abezinye izizwe benza izinhlelo ezikhombisa impumelelo nendlela eya phambili kodwa thina ndlu ensundu silibala wukuhlekisa nokunekela izwe ngezinkinga zemindeni yethu.
Uma sikhula bekuthiwa kakukho muzi ongashunqi ntuthu kodwa lokhu bekunganekelwa izwe ngoba kubalekelwa ukuthi kukhona izinto okungamele zinekelwe izwe.
Kangisho ukuthi makufihlwe ngisho izinto eziwukwephula umthetho kodwa ngizibuza ukuthi ngabe lo mama uwucabangile yini umthelela wenkulumo yakhe endodaneni yakhe lapho isiphumela ngaphandle.
Namanje ngisaqhubeka nokunxenxa abantu bakithi ukuthi make sizibheke izinto ezizosifakela ukubukwa okungadingeki thina nesizukulwane sethu, cabanga nje ukuthi lo mama nanini nanini uyolokhu esezinkundleni zokuxhumana njengoba sekuphele isonto lonke kodwa kusabhalwa ngaye njengoba sekukhona nama
enziwe ngaye ukuthi ukuxoxa nomuntu kungakwenza ugcine usukhulelwe. Make sifune ukubukwa ngezinto ezakhayo futhi ezizoba nomthelela omuhle emindenini yethu nasezizukulwaneni zethu.
Ngisekuzo ezikamabonakude masicacise lapha ekutheni uzah Moloi akasiyena umethuli omusha we-our Perfect Wedding (OPW) kodwa uzobamba isikhashana njengoba ingakaphothulwa inhlolokhono. Le ntokazi, edume kakhulu emdlalweni umuvhango KUSABC 2, izokwethula lolu hlelo ngozibandlela (December) kuphela, umethuli omusha uzongena ngomasingana (January) wonyaka ozayo.
Nolwazi@ilanganews.co.za