USEYAZIBAMBELA UBONGI EMCULWENI
SIKHUZA ibuya emculweni ngemuva kokunyamalala iminyaka singabonwa nangalukhalo kulo mkhakha isilomo somzwilili esizakhele udumo ngezingoma zomjuxuzo, ubongi Dube.
Ubongi owaziwa kakhulu ngamanoni okubalwa kuwona “Ngaphesheya Komfula”, “Uyimbali”, “Ngifuna Wena” nezinye engxoxweni ekhethekile abe nayo NELANGA Langesonto uzwakalise ukuthi sekuyisikhathi sokuba akhuze ibuya kulo mkhakha kwazise kuningi adlule kukhona njengoba ebesanyamalele.
“Ziningi izingqinamba engihlangabezane nazo kulesi sikhathi ngingekho kulo mkhakha okubalwa ukushonelwa ngubaba ngendlela namanje engingakayiqondi, kuya ezintweni ezibhalwe ngami eziningi zazo ebezingelona iqiniso,” kuchaza lo mculi oyindodakazi yesihlabani somculi we-reggae, ulucky Dube. Kuzokhumbuleka ukuthi udube udutshulwe wabulawa esigamekweni esichazwe njengesokuduna imoto kodwa yagcina ingathathwanga.
Nakuba lo mculi eveze ukuthi akazimisele ukukhuluma ngodaba lukayise kodwa uthi namanje usazibuza ukuthi kungani imoto igcine ingathathwanga umabekuyiyona ababulali abebeyidinga. Uthi njengoba ekhuza ibuya, kuningi akufundile ngawo lo mkhakha kwazise ngesikhathi engena bekuduma upotiyane kuyena, ebhalelwa izingoma futhkungekho okutheni abekuphawula ngomculo wakhe.
Uthi manje izinto sezishintshile njengoba esanda kukhipha ingoma esihloko sithi “Benginawe”. “Sengizozwisa abantu isandla sami emculweni njengoba sengizibhalela futhi sekukhona engikuphawulayo emculweni wami,” kusho le ntokazi ngephimbo layo elizothile.
Kuzokhumbuleka ukuthi phambilini ubongi ubesebenza nomondli Ngcobo obemdidiyelelizingoma kanti ubengaphansi kwenkampani kabheki Dlamini, iLoxion Records. Akafunanga ukuphawula ngobudlelwane anabo nalabo kodwa wancoma kakhulu ikhono likamondli emculweni.
“Ngeke ngiqambe amanga - umondli unekhono eliyisimanga futhi ngiyalihlonipha ikhono lakhe,” kuncoma lo mculi oseshadele kwandlovu.
Udalule ukuthi kule ngoma asanda kuyikhipha - usebenze noCkay kanti ayikho inkampani asayyine ngaphansi kwayo njengoba konke akwenzayo ukwenza ngaphansi kwenkampani yakhe. Uphethe ngokuthi izandla zivulekile ukuba axoxisane nezinkampani ezizimisele ukumsaayina kodwa ngeke azibophele ogodweni ngokuthola inkampani. lucky.cain@ilanganews.co.za