Iseyinkinga eyolwemali yesibonelelo sikahulumeni
KUYADUMAZA ukuzwa ukuthi namanje udaba lokuholelwa kwemali yesibonelelo sikahulumeni luseyinkinga.
Lokhu kulandela ukuthi ikomiti elibhekele izindaba zomnyango wokuthuthiswa komphakathi libize ungqongqoshe ubathabile Dlamini nababhekele ukuholelwa kwabantu bengalubhadanga kulowomhlangano ngolwesithathu.
Isizathu esibekwe yisikhulu esibambile kulo mnyango unkz Pearl Bengu ngesithi bebengeke beze ngoba bebengaphethe lutho abazolwethula ekomitini iportfolio Committee.
Usigxeke kakhulu lesisenzo usihlalo walelikomiti unkk Rose Capa wathi siwukungabahloniphi abaholi balemali okungabanikazi bayo.
Sithi kuyihlazo lokhu okwenziwa nguNgqongqoshe ubathabile Dlamini njengoba wazi kahle ukuthi udaba lwemali yesibonelelo lubucayi ngoba luthinta impilo yezigidi zabantu.
Lapha kuthinteka izingane eziyizintandane, ogogo nomkhulu ababeke ithemba labo kuyo.
Angisayiphathi eyalabo abangakwazi ukuzenzela izinto ngenxa yokugula nokudaleka kwabo.
Kuke kwaba nesidididi ngokuthi inkampani isouth African Social Security Agency SASSA isiphelelwe yisikhathi sayo kwanyakaza izwe lonke udaba lwaze lwaya enkantolo yanquma ukuba ungqongqoshe alulungise masinyane.
Yingakho nje ikomiti belibafuna ukuba bazosho ukuthi sebehambe bafikaphi nenqubekela phambili yalenkinga.
Yena unkz Dlamini usememezele ukuthi usekhulume nabaseposini ukuba benze lomsebenzi wokuholela kepha izazi zithi kunengozi yokuthi lolu hlelo neposi alukacaci futhi kungahle kube nengozi yokuthi ngenyanga kandasa (March) ozayo kube nenkinga kwabaholayo uma ingaxazululwa kusemanje.
Uma kungenzeka kube nenyanga eyodwa abantu abangezukuyihola lemali yesibonelelo kuzosho ukuthi ungqongqoshe uzolahlekelwa wukwethenjwa yizigidi zabntu balelizwe.
Umonakalo walokho ungaba mubi kakhulu kangangoba kungathinteka ngisho izinhliziyo zabavoti ngoba iningi labo litotobela khona ukuyovota ngoba lithokozela uhulumeni onakekela abantu.
Akancenge inhliziyo umadlamini abhekane nemibuzo eshisayo nezinsolo, akusekho ukujikela emuva kwendlu umengameli wamkhetha ngokumethemba ukuthi uzoyibamba ishisa insimbi.
Akafunde futhi ukuthi ehlise ulaka uma exinwa ngemibuzo njengoba abuye abe ngumholi wophiko lwabesifazane BE-ANC.
Sizokuthokozela ukuzwa ukuthi ugcine eyile nethimba lakhe kuqhamuke nesixazululo.
Uzohambela phezulu umadlamini uma eke waxazulula lenkinga, uzohlonishwa yizwe lonke likwazi nokumethemba nakwezinye izethembiso asazozenza.