Uhluphe i-arrows yaze yamsayinisa
UHLUPHE ilamontville Golden Arrows maqede yamsayinisa unkanyiso “Sgora” Mngwengwe obedlalela imngeni City emidlalweni yokuhlunga YESAB League.
Umngwengwe ujoyine icity esuka kwileven FC ebidlala kwimkhambathini Local Football Association kwazise udabuka Kwanyaba, Kwaximba.
Umngwengwe ufunde esansikana Primary kanti u-grade 12 uwuphothule emasijabule High School.
Ngemuva kwalokhu wenze izifundo zepharmacy e-university of Kwazulu-natal ophikweni lwasewestville. Akaqedanga kulesi sikhungo njengoba ethathwe yiAssmang okuyimayini ephethwe ngupatrice Motsepe, umengameli wemamelodi Sundowns, ezinze ecato Rigde.
Uthi le nkampani imthathe ngemuva kokubona imiphumela yakhe emihle yamnikeza umsebenzi elaboratory. Uncamele ukushiya isikole ngenxa yesimo sasekhaya. Ushiye kule nkampani ngoba esejoyina i-arrows ngonyaka wezi-2013.
Ingxoxo YELANGA Langesonto nomngwengwe ngempilo yakhe yangaphandle kwenkundla ihambe kanje:
ILANGA Langesonto: Ungumuntu onjani njengoba kwaziwa ukuthi uyathula?
Mngwengwe: Ngiwumuntu okukhonzile ukuthula kodwa hhayi ngoba ngizitshela. Yindlela engikhule ngayo. Angiwuthandi umsindo.
ILANGA Langesonto: Ukhulele ekhaya elinjani?
Mngwengwe: Ngikhulele emndenini omkhulu kakhulu. Ubaba ubenamakhosikazi amathathu nezingane ezingu-25, kanti umama unezili-11. Umama ube nenhlanhla yokuthola amawele. Uthole amawele aha-mba ngamabili kabili namathathu kanye. Kulawa amathathu kusele elilodwa ugugu. Nami nje ngiyiwele nokhanyisile.
Kukhona ulinda, ubheki, uthandi, ugugu, unkosi, yimina, ukhanyisile, uthemba nothembeka. Lapha angibabalanga ababili asebenda okwenza ngithi siyi-11 sesisonke kumama. Umama ngubangisile kanti ubaba ngundaba.
ILANGA Langesonto: Uyakuhalela ukuthatha isithembu njengoba ukhulele kusona?
Mngwengwe: Angikufisi nhlobo ngoba ngibazi kahle ubunzima bokukhulela esithenjini. Ngeke futhi ngibe nezingane eziningi kakhulu. Ngifuna ukuma nje kwezintathu. Thina sikhule ekhaya kulinywa, ukudla sikuthatha ensimini. Manje impilo kayisefani ngoba isidinga imali nsuku zonke. Abantu abasafuni ukulima.
ILANGA Langesonto: Ukhule uwumfana onjani njengoba ukhulele emakhaya?
Mngwengwe: Ngikhule ngilusa izinkomo njengoba ekhaya bekunemfuyo. Ngiyakwazi nje ukuhamba ngezinyawo ehlathini ungafake zicathulo. Ngikwazi kahle ukuhlatshwa ngameva ekwaluseni. Ekhaya besicupha nezinyoni futhi sidoba izinhlanzi njengoba sakhe eduze komfula umsunduzi.
ILANGA Langesonto: Usaya nje emakhaya noma usuzinze ethekwini?
Mngwengwe: Njengoba ngixoxa nawe nje (ngolwesihlanu emini) ngiphuma ejimini ngibheke ekhaya. Ngiya njalo ngaphambi kwemidlalo ngiyolanda izinhlanhla. (Bebedlala nepolokwane City izolo ngomgqibelo). Kunendlu engiyakhela umama ekhaya engilokhu ngiyoyibheka ukuthi bayakha kanjani. Ngikukhonzile emakhaya.
ILANGA Langesonto: Uyakholelwa emsamo?
Mngwengwe: Ngikholelwa kakhulu emsamo. Ngiyahlaba impela nje ekhaya ngoba ngikhule ngaleyo ndlela.
ILANGA Langesonto: Uhlala kuphi nendawo ethekwini?
Mngwengwe: Ngihlala efulethini emhlanga. Ngihlala kule ndawo ngoba kayinawo umsindo. Angithandi ukuba nezivakashi engingazimemanga. Nokho-ke ngisanda kuthenga umhlaba kwenye yezindawo zikanokusho ethekwini ngenhloso yokwakha umuzi.
ILANGA Langesonto: Usugcagcelwe?
Mngwengwe: Angikakashadelwa kodwa zizowushaya nje maduze. Sengizishaye zonke izinkomo ekhweni. Nokho-ke nginayo ingane uyandisa oneminyaka eyisi-6 ubudala.
ILANGA Langesonto: Uhamba ngaluphi uhlobo lwemoto?
Mngwengwe: Ngisebenzisa igolf 6 IGTI. Ngisanda kudayisa enye. Angizidingi izimoto eziyinqwaba ngoba angiphili impilo ewubukhazikhazi. Ngikhonze ukonga imali kakhulu.
ILANGA Langesonto: Uzimisele ngokwenzani uma usubeke amakhokho ethala?
Mngwengwe: Ikusasa ngililungiselela manje. Nginenkampani eyenza imisebenzi eminingi engimatasa nayo. Ngigxile kakhulu emisebenzini yokuhlanza nokukhuculula imfucuza neminye eminingi. Ngihlela ukuthuthukisa le nkampani igcine isibalwa nezinye ezinkulu.
ILANGA Langesonto: Usichitha kanjani isikhathi sakho uma ungekho ekhempini?
Mngwengwe: Ngikhonze ukuzihlalela endlini ngifunde izincwadi. Uma kungenjalo ngibhekisa amabombo ekhaya noma ngibe matasa nenkampani yami.
ILANGA Langesonto: Ukhona omunye umdlalo owukhonzile ngaphandle kwebhola lezinyawo?
Mngwengwe: Ngikhule ngizifela ngonobhutshuzwayo. Nokho-ke bengiyidlala neminye uma ngidlala kumasalga Game. Le midlalo ibikhiqiza abadlali abahle kodwa manje sekunzima ngoba abafana abancane sebegxile otshwaleni nokunaka amantombazane.
ILANGA Langesonto: Uyazihamba izindawo zobumnandi ezidumile ethekwini?
Mngwengwe: Angizihambi nhlobo lezo zindawo. Into eyenza lokhu wukuthi angibuthinti nhlobo utshwala. Nokho-ke angibaxwayi abantu abaphuzayo. Ngikhule bephuza ontanga yami ngasekhaya futhi bebeshayelelwa yimina imoto ngoba ngigwema ukuthi bangenzi izingozi. Anginankinga futhi nokuthengela umuntu ophuzayo yinqobo nje uma engeke angene emotweni.
ILANGA Langesonto: Iyiphi ikilabhu okhule uzifela ngayo kuleli naphesheya kwezilwandle?
Mngwengwe: Kuleli bengithanda ikaizer Chiefs kanti phesheya yichelsea yase-england nereal Madrid yasespain. Kwichiefs bengichazwa ngu-asanda “Scara” Ngobese.