Sebelwe imfuyo isihlabani somculo wokholo
Ubesajabulela ukuqokwa kumacrown
SIKHALA ngamasela asintshontshela imfuyo yaso isihlabani somculo wokholo ubutho Vuthela. Ubutho, obesajabulela ukuqokwa emncintiswaneni wamacrown Gospel Awards anonyaka, injabulo yakhe ibuyele nganeno ngomsombuluko evuka kwebiwe iziklabhu zakhe ezibalwe kwi-15 nezinkomo eziyi-10.
Lesi sigameko kubikwa ukuthi senzeke endaweni yase-upper Ngxaxha, emount Fletcher, e-eastern Cape, lapho lo mculi edabuka khona.
Exoxa ngosizi lokwebelwa imfuyo ubutho uzwakalise okukhulu ukudumala ngalesi sigameko njengoba eveze ukuthi sekungokwesibili kulo nyaka ehlangabezana nalesi simo.
“Ngoncwaba (August) bangintshontshele iziklabhu eziyi-115 okuyisilonda namanje esingakapholi kimina.
"Kunzima ukuthi ngisapholisa lesi bese ngiphinde ngilimala futhi,” kusho lo mculi ezwakala ukuthi udumele.
Uthi okumphatha kabi kakhulu wukuthi lokhu kwenzeka sekusondele amaholidi kazibandlela (December) okuyisikhathi avamise ukudayisa ngaso imfuyo.
“Njalo uma sekusondela uzibandlela ngivamise ukuthengisa ngengxenye yemfuyo yami ukuze ngikwazi ukondla umndeni wami ngiphinde ngithenge nezinto zikakhisimusi.
"Kubuhlungu ukuntshontshelwa into ekuphilisayo,” kuqhuba lo mculi oqokwe emkhakheni webest
Gospel Artist.
Uthi lesi sigameko siphazamise uhlelo lwakhe lokukhankasela ukuthola amavoti njengoba umkhakha aqokelwe kuwona uvotelwa wumphakathi.
“Bekumele ngabe ngihambela izindawo nginxusa abantu ukuba bangivotele kodwa manje sekumele ngigqigqe emaphoyiseni nakwikomiti esinalo elilwa nokwebiwa kwemfuyo endaweni,” kusho lo mculi ongenise nge-albhamu yakhe esihloko sithi “Okumanywe nguthixo”.
Uthi kudlangile ukwebiwa kwemfuyo endaweni yangakubo, ikakhulukazi uma unyaka usuya ngasemaphethelweni.
“Okwenza izigilamkhuba zikwazi ukucanasa kalula kule ndawo wukuthi isiteshi samaphoyisa sikude, ngakho noma uwabiza amaphoyisa afika sekwedlule kakhulu isikhathi.
"Kade sasinxusa ukuba kube nesiteshi samaphoyisa endaweni kodwa izikhalo zethu zishaywa indiva,” esho.
Ubutho useke wahlabana ngenqwaba yezindondo njengoba phakathi kwazo kubalwa ezamaCrown, Ingoma nezinye.
Useke wasebenza nenqwaba yabaculi abadumile kulo mkhakha okubalwa kubo uhlengiwe Mhlaba, Betusile, Dumi Mkokstad, Mthunzi Namba nabanye abaningi.
Imizamo yokuthola amaphoyisa ukuze aqinisekise ukuvulwa kwecala iphunzile njengoba ucingo lwasesiteshini sasekatkop belimpongoloza luze lube nesilokozane.
lucky.cain@ilanganews.co.za
Kunzima ukuthi ngisapholisa lesi bese ngiphinde ngilimala...