IYIBHIZINISI IMISAKAZO
KUYINKINGA ukuba ngumlaleli ngezinye izikhathi, ikakhulukazi labo abaze bafake izinhliziyo kulabo basakazi ababalandelayo. Ngokufaka izinhliziyo ngiqonde umlaleli osuke esefana nehhashi elifakwe amahhanisi nongeke wamtshela lutho ngalowo msakazi amkhonzile olubheke eceleni, kungakhathaleki ukuthi lokho okushoyo kuyiqiniso kangakanani. Lolu hlobo lomlaleli lungakubulala nokukubulala uma ukhuluma okungahambisani neqhawe lakhe.
Kujwayelekile-ke lokhu kulezi ziteshi ezinkulu ezisakazela umphakathi ezibizwa ngama- public broadcaster njengomhlobo Wenene, Ukhozi FM njalo njalo. Ngeshwa nje abaphathi banokusibheca ngosimende emehlweni, sigcine sikholwa wukuthi impela singabantu ababalulekile ekuthathweni kwezinqumo kanti kudlalwa ngathi.
Zingcono lezi ezenza inzuzo ngoba kuzona kucace bha njengempahla yembuzi ukuthi nakuba bekulalela okuphawulayo ngabakwenza emoyeni, khohlwa wukuthi uzobathathela izinqumo. Ama- public broadcaster akwenza uzizwe uyi- shareholder enkampanini ekhiqiza izigidi zamarandi nsuku zonke, kanti lutho, uzifanela nonogada nje, ophosa ihlo kokwenzeka enkampanini, ongasoze nanini wabizwa emhlanganweni wokuthatha izinqumo.
Ngizwe kahle njalo, ngokwenqubo le misakazo esebenzela phezu kwayo kumele ibeke thina nezincomo zethu phambili kodwa kuke kwenzeke nini lokho? Minyaka yonke uma kushintshwa abasakazi kakukaze nje kuthiwe kunethuba elivulelekile lokuba sithumele izincomo zethu bese besebenzela phezu kwazo.
Kufana nse nalokhu okwenzeka kwipolitiki, abantu bafunzwa abaholi abangabafuni nabangabazi nokubazi. Ukuba sibalulekile kuma- public broadcaster ngabe bayasivumela sizwakalise imizwa yethu.
Sekukangaki nje uzwa abalaleli sebesabisa ngokubhikisha uma kukhona umsakazi noma uhlelo abangaluzwa kahle? Angithi onkabi bakhohlisekile, bazibona bengama- shareholder impela kanti bona bayilawa asemaphepheni hhayi asemahhovisi abhekelele umsebenzi wansuku zonke.
Khona kungaba yisijingi esinjani ngempela uma kungathiwa abalaleli banikezwa amandla okuqasha nokuxosha abasakazi? Umlaleli phela akahlukile kumuntu wesifazane ongaziphethe kahle - namuhla uchazwa yilo, kusasa akasafuni nokumbona usefuna omunye. Ekugcineni lezi ziteshi zisebhizinisini bakithi ngakho ngeke kusize muntu ukuthukana nabasakazi ezinkundleni zokuxhumana kuze kusungulwe ama- group
imbala okuthukana nengane yomfazi. Yini ngempela le engaka enixakile ngoba phela kulula kulezi zinsuku, sesinenqwaba yemisakazo.
Kulula nje ukushintsha isiteshi, udlulele kwesinye. Ngiyazi ukulalela kwethu kuhambisana nezimpande zalokho esijwayele ukukwenza kodwa hhayi bakwethu, yibhizinisi leli elinabantu abaliphethe. Ukuze ubatalabhe kahle ngaphandle kokuzihlukumeza umphefumulo, shintsha umsakazo uma uzwa sekungena iscefe. Imikhankaso yokuthi makukhishwe abasakazi ake niyiqale le emuva emakini, bangaki nje abantu abangenamsebenzi walutho emndenini wakho? Uke wayisungula imikhankaso emndenini yokuthi leyo nebethoni idingiswe kini? Singayithokozela kakhulu neyakho imibono ngakho konke okuthinta ezemisakazo kule e-mail
engezansi nasezinkundleni zokuxhumana okutholakala kuzo umbhali. Instagram: @zowakha Facebook: Zowakha Mbatha Twitter: @Zowakha email: zowakha @ilanganews.co.za