BAZOKLONYELISWA ABASHAYA UMCULO WEGQOM
UKUKHULA komculo we-gqom sekuphoqe inkakha emculweni uvusi Leeuw akuba asungule ama- award okuklomelisa abaculi abacula lolu hlobo lomculo.
Ngokuthola KWILANGA Langesonto, isakhulunyelwa phansi indaba yokusungula la maaward kwazise kusenezinto ezisalungiswa.
Umthombo osondelene noleeuw udalule ukuthi okuningi usekwenzile njengoba esenabo abaxhasi kanti nosuku okuzokwenziwa ngalo umcimbi useluhlelile.
Lo mthombo uthi uleeuw usenokwesaba ngokusheshe akhulume ngalawa ma-award ngoba akazi ukuthi azokwamukelwa kanjani kulo mkhakha.
“Kahle hle ufuna ukuthi eqala ukukhuluma ngawo okuningi esekwenzile, esexhumene nabaxhasi nabo bonke abathintekayo. Uselinde ukuba kuphele ibhizi kaziba- ndlela (December) bese eyawamemezela ngokusemthethweni,” kusho umthombo.
Umculo we-gqom ungomunye ohamba phambili emzansi kulezi zinsuku njengoba kuyiwona ohlanyisa abantu kulezi zinsuku. Ethintwa uleeuw uqale waba manqika ukuphawula ngalawa ma- award kodwa wakuqinisekisa ukuthi kukhona okuthinta lolu hlobo lomculo akwenzayo.
“Okwamanje isikhathi besingakavumi ukuba ngiphawule ngakho kodwa ngingasho ukuthi kukhona esizokwenza ngonyaka ozayo,” kusho uleeuw engeza ngokuthi konke kuzocaca ekuqaleni konyaka ozayo.
Umthombo osebenza nale nkakha udalule ukuthi phakathi kwemikhakha ekhona kulawa maaward kubalwa owe-most Digital Downloaded Song, Best Song of the Year, Best International Achievement, Best Gqom Producer, Best DJ, Best Group, Best Artist, Best Female, Best Male, Best Collabo neminye.
Khona manjalo, ziyaqhubeka izinhlelo ngomcimbi wokuklomelisa ODJ ama-south African DJS Award ozoba semoses Mabhida Stadium ngomhlaka-23 kwephezulu.
Kulawa ma- award kuqokwe ODJ emikhakheni eyehlukene okubalwa nawo owegqom, owehip hop nowe-house. Kunxuswa abantu ukuba bavotele ODJ ababathandayo abaqokiwe njengoba kuvota abantu kula ma- award.
Phakathi kwabazonandisa kulawa ma- award kubalwa uroger Goode, DJ Bongz, Culoe De Song, DJ LAG, Veranda Panda kanti uhlelo luzobe luphethwe ukhaya Dladla odume ngelikagc.
Amathikithi aseqalile ukutholakala eticketpro (Edgars, CNA, JET) njengoba kukhona ajwayelekile nawezicukuthwane.
lucky.cain@ilanganews.co.za