Uyaveva umculi wokholo ngengoma
Usola upastor Dube ngokungahlonishwa kumacrowns
UYAVEVA umzwilili ngokungahlonishwa komsebenzi wakhe engomeni ehlomule ngendondo emcimbini wokuklomelisa abaculi bowokholo AMASABC Crown Gospel Award.
Ubrenda Mtambo ukhala ngengoma yespirit Of Praise esihloko sithi ‘Ungenzela Konke Okuhle’ eculwa ngupastor Benjamin Dube, ehlomule ngendondo yebest Praise Song kulo mcimbi obusenkosi Albert Luthuli International Convention Centre, ethekwini, ngeledlule.
Ngemuva kokuhlomula kwale ngoma, ubrenda ongumculi ozakhele udumo eqenjini lowokholo ijoyous Celebration ubabele enkundleni yokuxhumana ezwakalisa ukungenami kwakhe ngokuthi akahlonishwanga kule ngoma.
Lo mzwilili ubhale ekhasini lakhe lokuxhumana i-instagram wathi: “Ungenzela is my arrangement and I deserve to be recognized as an arranger if anyone decides to record it.” Ubrenda uqale ukuzwakala ecula le ngoma kwialbhamu yejoyous Celebration 20 eqoshelwe emoses Mabhida ethekwini.
Ethintwa lo mzwililil ngokungenami kwakhe uvumile ukuthi nebala akwehlanga kahle ukungahlonishwa kwakhe kule ngoma. “Ngimile emazwini engiwabhalile. Kumele ngihlonishwe ngomsebenzi wami,” kusho ubrenda.
Uthi ekuqaleni konyaka ube nomhlangano nops Dube emcela ukuba abe yingxenye yokuqoshwa kwale ngoma kwi-dvd yespirit of Praise.
“Ngesikhathi sokuqoshwa ngigcine ngingaphumelelanga ukuba ngibe khona. Kungimangazile ukuzwa ukuthi igcine iqoshiwe ngaphandle kokuba ngize ngibalwe ngokuyihlela ngendlela yami le ngoma.
"Angisho ukuthi ingoma ngeyami kodwa le ndlela eculwe ngayo kwispirit of Praise ngeyami, ngakho kumele ngihlonishwe ngalokho,” ecacisa.
Uthi okwamanje usaxoxisana nethimba asebenza nalo ngokuzokwenzeka ukuya phambili kodwa akazimisele ukuthatha izinyathelo zomthetho ngalolu daba.
Ulindelani Mkhize ongomunye wabasunguli beqembu ijoyous Celebration ukuqinisekisile ukuthi indlela le ngoma eculwa ngayo ngekabrenda.
“Uyiqophe kwijoyous20 futhi nathi sikubhalile ukuthi indlela ngekabrenda ngoba nguyena oqhamuke nayo.
"Kuyinsakavukela umchilo wesidwaba ukuculwa kwengoma eyodwa emculweni wowokholo kodwa izindlela ziyehluka kanti uma ukhetha ukucula ngendlela efanayo neyomunye kumqoka ukuba ukucacise ukuthi ngekabani indlela oyicula ngayo,” kuchaza umkhize.
Uthi ukufundiseka kubaculi bowokholo kusemqoka njengoba iningi labo linakho ukucula ezaziwayo zakudala.
“Asisho ukuthi kubi ukuthatha indlela yomunye umculi kodwa uma usukwenzile mubalule ukuthi ngumsebenzi wakhe,” echaza. Ubrenda ungomunye wabaculi abaphume kwijoyous Celebration bazimela emculweni njengoba enama-albhamu amabili, okubalwa esihloko sithi “So Much More” nethi “Inspired” kanti useke wasebenza nenqwaba yabaculi.
Ungomunye wabaculi abanephimbo elimangalisayo njengoba eseke wafanisa ngongoti emculweni nenkakha ubusi Mhlongo. Imizamo yokuthola ups Dube iphunzile njengoba ucingo lwakhe belumpongoloza lodwa lungabanjwa.
lucky.cain@ilanganews.co.za