Liyashabalala ithemba lokuvuka kwencandweni
Unkk Myeni ushone enesifiso sokuba livuke leli qembu
KUBUKEKA emancane kakhulu amathuba okuba lisayoke liphinde lihlangane iqembu lomculo wokholo incandweni Christ Ambassadors, elidlibhizeke eminyakeni eyedlule ngenxa yokungqubuzana okube khona kumalunga alo.
Leli qembu laseswazini, ebelihlanganiswe ngamalunga omndeni owodwa lifike lashisa izikhotha ngezingoma zalo okubalwa kuzo ethi “Zulu Khaya Lami”, “Bakhiphe Moses”, “Ukhonzaphi”, nezinye.
ILANGA Langesonto lithole ukuthi unina wamalunga aleli qembu unkk Solomia Myeni, umagumbi, ushone singafezekile isifiso sakhe abekhala ngaso sokuba alale kobandayo selibumbekile futhi leli qembu.
Ngokuthola kwaleli phephandaba unkk Myeni ushone ngoncwaba (August) kuwo lo nyaka. Kuthiwa emngcwabeni ezinye izikhulumi zikuvezile ukuthi unkk Myeni ubefisa ukuthi ahambe emhlabeni incandweni isivukile.
Namanye amaciko adumile, noprojusa bomculo wokholo bathi bake bayikhuluma le ndaba yoku- ba kulungiswe izinto kuleli qembu kodwa abakwazi ukungena bangamanxe ezindabeni zalo bengamenyiwe.
Utimothy, Thabile, nomziwakhe ngokulandelana, bazalwa ngunkk Myeni futhi yibona abangabasunguli namalungu okuqala encandweni Christ Ambassadors.
Kwabo bayi-11, utimothy ungowesi-9, elanywa nguthabile kanti umzwakhe welama uthabile nguye onguthunjana.
ILANGA Langesonto libe selixhumana nomzwakhe lifuna ukuthola ukuthi kukhona yini abakwenzayo ukulungisa isimo ukuze babuyelane, kufezeke isifiso sikanina.
Uphawule kanje ngamafuphi: “Ngicela nisinike ithuba njengomndeni, sizilile kodwa okunye ungathintana nomfowethu (esho utimothy).”
Ethintwa utimothy ngesonto eledlule uthe ucela ukubuye athintwe ngoba usesibhedlela. Kuleli sonto intatheli iphinde yamshayela ucingo ukuze aphawule.
Walile ukuphawula, wacela ukuvala ucingo. Sekuwumlando ukuthi leli qembu ligcine ukuba ndawonye ngesikhathi liqopha IDVD ejesus Dome, emayville, ethekwini, lavalelisa ngecwecwe elithi “Buya Nkosi Jesu”.
Incandweni ihlukane ngemuva kokungqubuzana kwamalunga ayo eminyakeni edlule.
Enye yezinto eke yabikwa wukubangwa kwemali. hlongwaj@ilanganews.co.za
Ngicela nisinike ithuba njengomndeni, sizilile kodwa okunye...