IZOQHAKAMBISA UMGUNGUMDLOVU IKWAYA YE-GOSPEL
IZOQHAKAMBISA ikhono laseMgungundlovu namaphethelo ikhwaya imgungundlovu Gospel Choir ezobe iqopha bukhoma ewinton Churchil epietermaritzburg mhla ziyi-8 kwephezulu. Leli khwaya linamalunga angama-39, okuhlanganisa kulo nabadlali bezinsimbi kanti liqoqe abantu abasha abaqhamuka ngaphansi koMkhandlu umgungundlovu.
Kulindeleke ukuba leli khwaya liqophe bukhoma emcimbini ozobe ubophele nabanye abaculi bowokholo abanohlonze. Ngokusho kukathula Mhlophe ongumsunguli waleli khwaya, kuyintokozo ukuthi ekugcineni sebezoyiqopha bukhoma I-DVD yabo.
“Bekumele siqophe ngonyaka owedlule kodwa ngenxa yezingqinamba esihlangabezane nazo sagcina singakwazanga. Ngakho ngolwesihlanu oluzayo sizobe sesilifeza leli phupho lami leminyaka,” kusho uthula naye obuye acule kuleli khwaya.
Uthi ngesikhathi elihlanganisa wenze izinhlolokhono ezindaweni ezahlukene komasipala abangaphansi komgungundlovu.
“Njengoba sinomasipala abayisikhombisa, sibahambele bonke sithungatha ikhono. Siyajabula ngekhono esilitholile njengoba bengagcini ngokukwazi ukucula kuphela kodwa nekhono lokubhala izingoma benalo.
"Abaculi esibatholile banezingoma abazibhalele zona nokuyinto esijabulisa kakhulu,” echaza. Uthi amalunga aleli khwaya azophinde athole nethuba lokuqeqesheka ngomculo, afundiswe ngezinto ezahlukene ezithinta lo mkhakha ukuze uma esekhetha ukuzimela abe esehlome ngolwazi olwanele.
“Ngeke sibavimbe uma sebefuna ukukhula bazimele kodwa kuyosijabulisa ukuba bathi bedlulela phambili emculweni kube khona esibahlomise ngakho,” eqhuba.
Abanye abaculi bowokholo abazobe beshiyelana inkundla naleli khwaya kubalwa umalusi Ndimande onengoma ayenze naleli khwaya, umthokozisi Zakwe, Babo Ngcobo, Nathi nonkanyiso nabanye.
Amathikithi okuba yingxenye yalo mcimbi aseqalile ukutholakala ecomputickets. Uthula unxusa abantu ukuba baphume ngobuningi.
“Kuzobe kuqopheka umlando njengoba kuzobe kuwukuqala kwesikhungo sokuthuthukisa amaciko emgungundlovu namaphethelo.
"Okuhle wukuthi simeme nabadidiyeli bomculo abasezingeni abazobe bekhona ukuzobona ikhono esinalo emculweni,” ephetha.
lucky.cain@ilanganews.co.za