Itshalwa namuhla imisebeyelanga
Konke sekuhleliwe
IYABEKWA namuhla inkosi yasethembezinhle uvelamuhle Shembe (55) emzini wayo esibanini, emthwalume, eningizimu yekwazulu-natal, emuva kwenkonzo yomlindelo eqhubeke ubusuku bonke.
ILANGA Langesonto lithole ngemithombo yalo eyethembekile ukuthi nanxa izobekwa ethembezinhle kodwa bekumele iyolala kubo ekuphakameni, enanda, entshonalanga yetheku.
Ikhulunyelwa phansi leyo ndaba, kuthiwa kuzothi sekwedlule umfihlo wayo bese umndeni wonke kubalwa nowasekuphakameni oholwa yinkosi uvukile, Incoyincoyi, kuthathwe isinqumo ngokuba igcine ilale kubo.
Kuthiwa kuyinqubo yaleli bandla ukuba amadodana akhona onke abekwe ekha-ya, kuze kuthiwe ngisho nenkosi u-amos Khula Shembe kwakumele ilaliswe khona kepha ngenxa yesimo eyahamba ngaphansi kwaso yangabekwa khona. Uhlelo lwanamuhla kulindeleke ukuba luholwe yilo ibandla, kube khona nezikhulumi ezahlukene zikahulumeni.
Uhulumeni wakwazulu-natal usifezile isethembiso sakhe sokuthumela zonke izinsiza, kubalwa namaphoyisa azoqapha isimo. Kubikwa ukuthi kusukela ngolwesihlanu kube nokusebenzisana okuhle phakathi komndeni nohulumeni.
Kusenzima ukwemukela isimo kwabanye abebesondelene kakhulu nemisebe kangangoba bazoze babekhona namuhla. Omunye okhulume NELANGA Langesonto kodwa ongathandanga ukuba igama lakhe lidalulwe uthe:
“Ngifike ethembezinhle ngasheshe ngabuyela ekhaya ngiyozila ngoba angikayikholwa le nto esehlele.
“Ngizobakhona emfihlweni ngoba kumele ngibe khona kodwa ngifana nongekho kwamina.” Yehlulekile imizamo yokuthola uhlelo lonke lwanamuhla.