SIZOKHISHWA KABUSHA ISIGWEBO SIKAMBHISHOBHI
KUYODELA umakhasana yena oyozibona zibulalana enkantolo yobugebengu obuhleliwe ethekwini ngehora le-12 emini bebade lapho kuzobe sekuyihlandla lesine kungongaphansi nongaphezulu, kuliwa nokugwetshwa okwesibili kukambhishobhi Jabulani Mvubu ongayi phansi engandlalelwe.
Umbhishobhi Mvubu osebizwa ngo”phunyukabemphethe” emuva kokuba elahlwe ngamacala angama-574 okukhwabanisa, wawavuma ngephuzu lokuthi ubezama ukusiza umphakathi awufukule ube namabhizinisi.
Kubenesidididi ekugwetshweni kwakhe - phambilini uke wagwetshwa amahora ayizi-7000, alale ejele izimpelasonto kuthi phakathi nesonto abe ngokhululekile.
Ngaleso sikhathi egwetshwa uyalelwe ukuba aphinde akhokhele izisulu imali yazo njalo ngenyanga njengoba enikwe ithuba lokuba ngaphandle ngezinsuku zomsebenzi ukuze akwazi ukugaya imali yokuzikhokhela.
Izikhulu zamajele zisichithile lesi sigwebo, zathi kukhona lapho singacacile kahle khona, zacela ukuba kubuyelwe enkantolo imantshi unkz Christo Mazibuko aphinde akhiphe esinye.
Njengoba bekumele agwetshwe ngeledlule kakubange kusenzeka ngoba umshushisi wenkantolo unkz Hazel Sararamen ubengekho eshonelwe ngunina. Akwaziwa mbhantshi kujiya ngolwesithathu ukuthi sizofezeka yini isifiso semantshi sokuba liphele leli cala elaqala ngonyaka wezi-2015 ngozibandlela (December).
Umbhishobhi Mvubu unebandla ithe Grace Ministries emzinto. Abake baye ebandleni lakhe bathi akashumayeli uyaqeqebula.
Kubukeka sengathi indlela emyisa ezikhindini imfiliba njengoba izisulu sezifuna imali nanku nokhisimusi uyamemeza. Umbhishobhi Mvubu umelwe ngumnu Sogoyile Nene ojutshwe ngumnu Sipho Ngubane waseMgungundlovu. knowledge.simelane@ilanganews. co.za