NGOKUZIMISELA UNGAPHUMA EZIDAKAMIZWENI
AKE ucabange ngomuntu ozimiselayo ukuba aziqoqe, aqhubeke nempilo naphezu kokuba umhlaba umgixabeze ngezinye zalezi zinselelo:
ukuzalelwa ngaphandle komshado qede uyihlo anyamalale usale nonyoko uneminyaka eyisi-7;
ukushona kukanyoko obekondla ngemali yasemajalidini, kamuva nangempesheni yakwahulumeni;
ukuphila emgwaqweni edurban Station kusukela ngowezi-2004 kuze kube ngowezi-2011;
ukuphenduka wamukele ujesu kuthi kamuva usathane akukhiphe ayokucwilisa ezidakamizweni;
ukubisha ezikweletini ugcine usuphila ngokubalekela abantu obakweletayo.
Lowo ngujoshua Zitha ohlala esigcemeni kwag emlazi eningizimu yetheku.
Ujoshua ubonga inkosi ujesu ngokuvuselela impilo yakhe njengoba manje enohlelo alwethulayo esiteshini somsakazo womphakathi idivine Touch 107.2 FM, amagumbi aso okusakaza akwa No. 422 Stella Road, emalvern.
Lolu hlelo ulwenza ngokubambisana nonkz Smangele Welile Maphumulo njalo ngolwesine ligamenxe elokuqala emini.
Okunye okusenhliziyweni yakhe kakhulu kulezi zinsuku wumkhankaso wokwaluleka intsha ngengozi yokusebenzisa izidakamizwa. UNGUBANI UJOSHUA?
Ujoshua wazalwa mhla zingama-21 kulwezi (November) ngowe1970, ngu-agnes Mbhele nosolomon Zitha. Uqale imfundo yamabanga okuqala embalasi Primary kwa-a, emlazi. Ngowe-1986 umndeni wakhe wasuka kwa-a waya kwa-e khona emlaza.
Ngalesi sikhathi ujoshua wayeseyokwenza ibanga 4-5 emanzolwandle Primary. Kuthe ngowe1988 wadlulela Kwashaka High School lapho ehlale unyaka waba munye, qede wadlulela echesterville High lapho efunde waphelela kwastandard 9, ngenxa yokuphela kwemali wangabe esafika kumatikuletsheni kodwa waphoqeka ukuyofuna umsebenzi.
Usebenzile ezindaweni eziningana, kuzona okubalwa i-pnp Musgrave Centre, ne-rocket Powder Coating. Ngowezi-2004 kushone unina, nokwalandelwa wubunzima bempilo waze wangena emkhubeni wokusebenzisa izidakamizwa ehlala edurban Station, elala emapaki.
UBIZWA NGUNKULUNKULU Uqhubekile-ke nale mpilo kwaze kwaba ngowezi-2011 lapho ngolunye usuku, emini kwabha wezwa iphimbo lomuntu ongabonakali limyalela ukuba avuke entathakusa, asuke lapho aye emlazi.
Uthi nebala wenza njengokusho kwalelo lizwi. Uhambe ngezinyawo waze wafika kwas khona emlazi nokulapho afica khona itende liwile. Labuya futhi izwi lathi kuye uma engangena kulelo tende, zingaphela izinkinga ayebhekene nazo.
Emuva kwalokho kwafika imvula enkulu enamandla. Wayesekhumbula ukuthi wayenomngani, ukhonza Gumede igama lakhe, owayehlala esigcemeni kwag. Waya-ke kubo kwakhonza wamfica endlini.
Umngani wakhe wamtshela ukuthi nxa ezimisele ukuba ahlale naye, kuzomele alungele ukuya esontweni njalo ngesonto ngoba yena useyakholwa. Nangempela bavukela khona lapho kwakunetende elalikade liwile kodwa selibuye lavuswa.
Ngalolo suku kwakushumayela umfundisi webandla i-agape Fellowship nokuthe ekupheleni kwentshumayelo wacela ukuba labo abafisa ukwamukela inkosi ujesu, beze ngaphambili.
Akukhumbulayo wukuthi kwaba nguye yedwa owazinikela ngalolo suku. Emuva kokusindiswa waba mkhulu umehluko owenzeka empilweni yakhe ngoba emuva kwamasonto ambalwa waqashwa ECNR, espringfield.
Nakuleso sigaba empilweni yakhe isitha esingusathane asiyekanga ukuhlasela, kangangoba wazi- thola esebuyele futhi ezidakamizweni waze waphelelwa wumsebenzi owawumholela kahle enkampanini ye- security.
Kwaze kwafika esimeni lapho ayeseyinto yasemashibhini futhi ecwilile nasezikweletini ngenxa yomashonisa, esephila ngokubalekela abantu abakweletayo. Kwashabalala amaphupho amahle abenawo ngempilo yakhe.
UVUKA UYAZITHATHA
Kwafika kuyena ukuthi wayesekhathele yile mpilo ngakho, wenza isinqumo sokuzibuyisela enkosini. Waya e-agape Fellowship khona esigcemeni kwag emlaza.
Nebala impilo yakhe yaguquka. Njengamanje uzinikele kuleli bandla lapho ebuye abe yilungu leqembu elikhapha ikhwaya yebandla ngezinsimbi njengoba yena edlala i- bass guitar.
Ufinyelela kuleli qophelo njena nokho ubese-ke wenza okuningana empilweni njengokuzama umsebenzi wezolimo emakhaya engonyameni kodwa akwaze kwalunga.
Uke waxhumana futhi nomnu Xolani Majozi osehhovisi eliphethe izindaba zeladysmith Black Mambazo ukuze angene endimeni yezomculo, nakhona akazange aphumelele.
Ngalolu hlelo alwenza emsakazweni ubonga unkulunkulu osebenzise abaphathi besiteshi kanye nethimba labasakazi baso, ngokumemukela kahle kwabo.
bonginkosi@ilanganews.co.za