BASHAYE KHONA ABE-GENERATIONS THE LEGACY
ASIBONGE kubabhali begenerations: The Legacy, ewumdlalo owuchungechunge okhonjiswa esiteshini sikamabonakude ISABC 1 nsukuzonke, phakathi nesonto ngehora lesi-8 ebusuku.
Phela lo mdlalo uqale ukukhonjiswa ubizwa ngegenerations kwasuka izidubedube okuholele ekubeni umiswe, wabuya usuyiGenerations: The Legacy, nayo eqale iyinsambatheka yento kodwa kwagcina ngokubonakala ukukhanya.
Kuye kwenzeke ngibone izinto ezingahlelekile kulo mdlalo kodwa phela uma benza kahle kumele sibethulele isigqoko. Kamuva nje okungihlabe umxhwele kulo mdlalo yindawo elingiswa ngugetrude Diale, lapho engena khona ekuthwaseni.
Kukaningi sibona emidlalweni kamabonakude bezama ukwenza izinto zamadlozi bese behluleka, bashaye into eseceleni, okwenza kugcine abelaphi bendabuko bedinwa befa, bakhononde ngokuthi kufunzwa umphakathi okungeyikho.
Indaba-ke isuke isale kubacwaningi bomdlalo okuyibo abasuke beqoqe ulwazi olungashayi khona. Mangisho nje ukuthi impela kulo- khu basebenze umsebenzi omuhle abacwaningi nababhali balo mdlalo.
Kusukela ekulahlekelweni kukagetty yingcebo yakhe, kuye emaphusheni amfikelayo, kuze kube yilapho engena khona kumuntu ozomthwasisa. Omuntu ongayiqondi indaba yokuthwasa uma ebuka indlela okwenzeke ngayo kulo mdlalo uthola isithombe sokuthi kwenzekani kumuntu uma engenwa yidlozi.
Ngiyazi futhi ukuthi kukhona nabanye bethu abakholelwa kokwehlukile kodwa engikuthande ngalo mdlalo wukuthi uphinde wacacisa ngokungaxabani kwe- nkolo nosiko. Kuningi okuyisifundo okutholakale ngale ndima, osekusele kuthina ukuthi siyasithatha yini isifundo noma qha. Nokho engikuqaphelile ngokwenzeke ngolwesine esiqeshini sangolwesihlanu ngesonto eledlule, lapho bekushiswa khona impepho kuphelezelwa ugetty, wukuthi kusamele kufundiswe ababhali ngokuthi impepho iwusiko, kakuyona eyezangoma kuphela, kawukwazike ukuvele ushise impepho noma yikuphi.
Lokhu kuke kwakhalwa ngakho kakhulu kuwona lo mdlalo phambilini, lapho ibishiswa ngusbusiso Dlomo (Menzi Ngubane), eyishisela phansi kombhede.
Kusamele abantu bafundiseke impela ukuthi impepho ishiswa kuphi, ishiswa ngubani futhi eyishiselani. Njengoba bengike ngasho ukuthi engosini yanamuhla angiqondile ukugxeka, kodwa ngiqonde ukuveza okuhle.
Singaphinde sicele futhi kubabhali nabakhiqizi bemidlalo ukuthi njengoba sekuyisikhathi samaholide, nabantwana begcwele indlu, sicela imidlalo enohlonze, efundisayo ngempilo iphinde ishiye abantwana bekwazi ukwenza izinqumo eziphusile.
Okunye engikhala ngakho futhi wukuthi sikhathele wukubuka imidlalo emidala eseyaphelelwa yisikhathi kodwa kuthiwa idlalwa ngoba iqondene nesikhathi sikakhisimuzi.
Masixolelwe bakithi ngedinner for One, ekhonjiswa cishe kuwona wonke amashaneli.
Nolwazi@ilanganews.co.za