BAZOYITHOKOZELA NAKANJANI ODADO I-FERDINAND
ISIHLOKO: Ferdinand UHLOBO: Animation/adventure/ Comedy/family ISIKHATHI: 107 minutes ABALINGISI ABAPHAMBILI: John Cena, Kate Mckinnon, Gona Rodriguez, Anthony Anderson, nabanye
NAKULELI sonto, kulawo mamovie azongena kule nyanga sibone kukuhle ukuba siqoke leyo esinethemba lokuthi izothokozelwa kakhulu ngosobancane, esihloko sithi Ferdinand.
Siyakhumbula ukuthi nasemasontweni amabili edlule silobe ngenye imovie nayo futhi elungele bona abantwana.
Isizathu sokuba sithi ukugxila kulawa ma- movie wukuthi siyazi ukuthi njengoba kuyisikhathi samaholidi, nezikole zivaliwe bayathanda abantwana ukunakwa, bavakashiswe ezindaweni ezahlukene okubalwa kuzo nakhona ema- cinema ukuze bazithokozise.
Kusemqoka-ke ukuba kuthi uma bekhishiwe bafike bathokoze ngempela lapho besuke bekhishelwe khona, babuyele ekhaya bethokozile.
Le movie esikhuluma ngayo namhlanje edlalwa ngopopayi maningi amathuba okuba bayithokozele. Isuselwe encwadini eyabhalwa ngumunro Leaf, esihloko sithi The Story of Ferdinand.
Imayelana nenkunzi enenhliziyo enhle, okwenzekile yadidaniswa nenye eyingozi.
U-ferdinand lo ube esebanjwa ahlukaniswe nomndeni wakhe, ayiswe espain emdlalweni lapho kuqhathwa khona izinkunzi. Nakuba le nkunzi ibukeka inkulu futhi engathi inolaka kodwa ayiyingeni indaba yokulwa, ayizwani nodlame. Ithatha isinqumo sokweqa kule ndawo, ngosizo lwezinye izilwane.
Okunye okungenzeka kuthokozelwe ngabaningi wukwazi ukuthi izwi likaferdinand kule movie, yizwi likajohn Cena, odume kakhulu emdlalweni IWWE Wrestling.
Okwenzeka kule movie kukhomba ngokusobala ukuthi ayihlabi ngakumisa.
Le movie iphume ziyi-15 kuyo le nyanga kanti izoqala ukukhonjiswa ema- cinema mhla zingama-22 kwephezulu.