UMUHLE UMSEBENZI WAMABHENANYAWO
MHLELI, ngiyakhuleka kumdlokombane. Ngiphinde ngikhuleke emakhosini ohlanga enhla nasezansi kwelikamthaniya. Bese ngibingelela wonke umfundi wephephandaba lethu esilithandayo.
Kwelakho elidedela imisebe ibuye nendaba ngicela ungiphe iphepha ngoba usiba nalu ngiluphethe. Cha belu angizoba mude. Ngokufundiswa kwethu emakhaya esiphuma kuwo kuthiwa into enhle iyanconywa.
Sesingavuma ukuthi umaskandi okuwumculo esiwuthandayo usukwelinye izinga. Wonke umuntu usuzwa ekhuluma ngomaskandi, kungaba omncane noma omdala. Empeleni ngiyafisa ukuchoma Amabhenanyawo uphaphe lwegwalagwala ngecwecwe lawo elisihloko sithi Akhuphula Umkhomazi.
Ngingumlandeli omdala kamasikandi kepha kungokokuqala ngqa ukuba omasikandi abayisikhombisa bahlanganyele ndawonye baze bakhiphe icwecwe, okungubaba Phuzekhemisi, baba Mkhanyiselwa, Ichwane lebhaca, Mbuzeni, Bahubhe, Thwasa lekhansela kanye nenyonemhlophe. Lokho kwagcina ngezingqungqulu zomhlaba.
Into engiyiqaphele kuleli cwecwe wukuthi liphethe umyalezo ojulile wodwa. Uyazi ngehluleka nokuthatha izingoma ezimbala ngoba zonke zinomyalezo ojulile. Kukhona ingoma ethi Izimbali zezwe, enezinhlamvu ezithi: “Uyalibona isoka lakho lidlala kabi malidlala kanje.” Le ngoma iyodwa isitshela ngokuthi umuntu wesimame ubaluleke kanjani. Kube nenye ethi: “Angifuni ukuba yikhansela, kungcono ngibe yinduna. Ngoba kwakhansela kuyafiwa.”
Uma kudlala le ngoma uvele ufikelwe wusizi nezinyembezi ngenxa yegazi eseligobhozile esizweni sikandabezitha ngenxa yobukhansela.
Ngiyafisa nabanye abaculi basike iphethini kumabhenanyawo, bangakwebhani kepha basinike ukudla kwethu kwendlebe. Mabhenanyawo, niyisibonelo emphakathini.
Nathi balandeli asiyekeni lo mkhuba omubi esiwenzayo wokuthenga umculo ngo-r10 emgwaqweni. Kepha asithenge umculo okuyiwo, ngoba ngeke kwasisiza ukuba sithuthukise isigebengu emgwaqweni, iciko lona libe lilimala.
Bese ngicela abantu bomthetho okuba bayisukumele le nto yabantu abadayisa amacd omkokotelo emgwaqweni ngoba awukho umehluko kubona nababamba inkunzi. Ababoshwe, ubugebengu buyafana. Umthetho awusebenze ngokufana kuwona wonke umuntu. Phambili maciko ethu!
Nkosingiphile Mphuthi Esipingo