Ukhonze ukuhleka nokugconana
USEZINHLELWENI zokungena kwezamabhizinisi udumisani “Du” Zuma ojoyine ikaizer Chiefs ekuqaleni kwesizini kungalindele muntu.
Lo mdlali uthi unxuswe ngabanye babangani bakhe ukuba angene emabhizinisini kusemanje ukuze ahlele kahle impilo yakhe esemusha.
Nokho akakafuni ukuphumela obala ngomkhakha azimisele ngokugxila kuwona. Uzuma ungomunye wabadlali okusabhekwe lukhulu kubona njengoba emakilabhini abewadlalela phambilini ebengalibheki ipali.
Lo mdlali udabuka embali, emgungundlovu. Ufunde embali Primary wadlulela ehlelingomusa ngaphambi kokuphothula umatikuletsheni ezama Zulu High School khona emgungundlovu. Emazingeni aphansi udlalele ifrance FC eneminyaka eli-11 ubudala.
Ngesikhathi esezibona ukuthi liyakhula izinga lakhe lebhola uqome igrange Stars FC eneminyaka eli-13 ngaphambi kokufudukela emophela lapho efike wadlalela ikings United (eseyashintsha igama njengoba isibizwa ngereal Kings United) ngowezi-2011/2012.
Ikhono lakhe libe selibonwa yibloemfontein Celtic ngowezi-2013/2014. Ukugqama kwakhe kwiceltic kwenze waheha iso lezimpofana. Ingxoxo YELANGA
Langesonto nozuma ngempilo yakhe yangaphandle kwenkundla ihambe kanje:
ILANGA Langesonto: Ubukeka ungumuntu onamahloni.
Zuma: Hahaha... Impela kunjalo. Nginamahloni kakhulu futhi ngingumuntu othulayo. Nokho ngikukhonzile ukuhleka ikakhulukazi uma ngizihlalele nabangani bami. Ngiyakuthanda ukugconana uma ngihlezi nabangani bami ngoba kwenza siluqhube kamnandi usuku, sizijabulele.
ILANGA Langesonto: Usichitha kanjani isikhathi uma ungadlali?
Zuma: Ngikhonze ukudlala iplay Station futhi ngiwumpetha kuyona. Ngesinye isikhathi sivakashela izindawo ezahlukene nezinxanxathela zezitolo.
ILANGA Langesonto: Yimuphi umdlali ovamise ukusebenzisa ikamelo elilodwa naye? Zuma: Ubrilliant “Casillas” Khuzwayo ongunozinti nguyena okwazi ukuphilisana nami kwazise ungumkhaya futhi usenesikhathi eside kunami kwichiefs. Ziningi kakhulu izeluleko angini- futhi uyangikhulisa ngokomqondo ukuba ngikwazi ukubhekana nengcindezi yokudlalela ikilabhu enkulu njechiefs.
ILANGA Langesonto: Yithi qaphu ngomndeni wakho.
Zuma: Abazali bami abasekho. Nokho sibaningi impela emndenini kwazise kukhona ugogo wami umamsomi, u- Anti Delly omdala, umso ongubaba omncane, untoko, ukha nomalume umusa futhi bayazifela ngebhola.
Ngizalwa nothobane oyinkosana, kube ngubhekisisa bese kuba yimi umagcino. Umama wami ngunelisiwe osewadlula emhlabeni nothandazile Zondi ongudadewabo kamama. Uthemba owayengumalume usa- ka zona dlula emhlabeni.
ILANGA Langesonto: Ukhulele ekhaya elinjani?
Zuma: Nakuba besisokola kodwa ukuba nothando kwabazali bami kanjalo nezihlobo kwenze umuntu wakhula kahle akaze angena nasezintweni ezimbi njengezidakamizwa nophuzo oludakayo. Ukuzwana komndeni kwenze ngahlala kwa-anti uzandi ohlangothini lwakwazuma enorthdale ngesikhathi ngidlala kwikings United ngowezi-2011/2012 ngineminyaka eli-18.
ILANGA Langesonto: Usushadile?
Zuma: Cha, futhi kanginazo izinhlelo zokushadelwa okwamanje kwazise ngisabhekene nebhola kuphela. Ngingumuntu oziphethe kahle futhi kanginayo nengane.
ILANGA Langesonto: Uyakwazi ukupheka?
Zuma: Ngiyalishaya ibhodwe. Ngingumuntu okholelwa ekuzenzeleni izinto isikhathi esiningi. Ngikhonze kakhulu uphuthu nenyama eyosiwe.
ILANGA Langesonto: Yisiphi isilwane osesabayo?
Zuma: Yinyoka futhi kangifuni ngisho ukudlalela eduze kwayo. Ngithanda kakhulu izinja.
ILANGA Langesonto: Iliphi izwe ofisa ukulivakashela?
Zuma: Yisebrazil ngenxa yolwandle lwakhona oluhlukile kunolwaseningizimu Afrika.
ILANGA Langesonto: Yini eyokuqala oyenzayo uma uvuka ekuseni?
Zuma: Ukugeza amazinyo bese ngibheka imiyalezo kumakhalekhukhwini wami.
ILANGA Langesonto: Ukhona ezinkundleni zokuxhumana?
Zuma: Yebo ngikhona kwifacebook nakwi-instagram. Ikheli lami kwi-instagram ngu: Zuma?dumsani95.
ILANGA Langesonto: Yimuphi umculi omuthandayo?
Zuma: Ngizifela ngedurban Kwaito ikakhulukazi idistruction Boyz. Leli qembu lingigeza ngaphakathi ngomculo walo.
ILANGA Langesonto:
Ukhona umdlalo owuchungechunge ozifela ngawo? Zuma:
Yithe Queen, abalingisi balo mdlalo bangishaya ngaphakathi ikakhulukazi umalume ubrutus (olingiswa nguthemba Ndaba). Uyangichaza. Hahaha...
ILANGA Langesonto: Yisiphi isiqholo osisebenzisayo?
Zuma: Yichanel for Men ngoba ingenza ngizizwe ngizelwe kabusha. Ukunuka kahle kumqoka kakhulu kithina ngoba umzimba wethu uyajuluka ensimini.
ILANGA Langesonto: Utshabaza ngohlobo olunjani lwemoto?
Zuma: Nginevw iscirocco, iyashibilika emgwaqeni.
ILANGA Langesonto: Ukhonza kuliphi ibandla?
Zuma: Ngiyikhatholika (Roman Catholic Church). Uma nginaso isikhathi ngiyaya impela enkonzweni.
ILANGA Langesonto: Yimuphi umbala owuthandayo?
Zuma: Ngithanda omhlophe nomnyama. Yomibili le mibala igqama kahle kumuntu.
ILANGA Langesonto: Yikuphi ofisa ukukuzuza kule sizini?
Zuma: Wukuqinisa indawo esikimini sekilabhu. Ngisalwa nakho ngaphambi kokubheka okunye. Okwamanje ngizini- ke isikhathi sokufunda ukudlalela ikilabhu enjengechiefs. Ngenhlanhla enkulu nabalingani bami abanesipiliyoni bayangisiza okwenza izinto zibe lula kakhulu.
ILANGA Langesonto: Yimuphi umdlali omkhonzile?
Zuma: Ngulionel Messi waseArgentina ogijima kwibarcelona espain. Umessi wenza ukudlala ibhola kubukeke kuyinto elula kakhulu. Ngichazwa nayindlela ashibilika ngayo nebhola enkundleni.
ILANGA Langesonto: Uthini umyalezo wakho entsheni?
Zuma: Mayingalilahli ithemba. Konke kuyenzeka emhlabeni yinqobo nje uma uthando nokuzimisela kukhona. Imfundo ibaluleke kakhulu kwazise iwukhiye wokuningi. Mayigweme abangani ababi abazoyidukisa. Kumele yazi ukuthi akafuneki umuntu ongelona usizo empilweni yakho.