I-KINGS NOTHONGATHI BETHEMBISA ULOZOLO
BAFUNA ukuvalelisa abalandeli bekilabhu ngegiya eliphezulu abothongathi FC ezovovana inkani nereal Kings United kowenational First Division (NFD) namuhla ngeSonto ngo-15h30 eking Zwelithini Stadium, emlazi.
Uphilani “Wele” Gumede oyisitobha sothongathi FC utshele ILANGA Langesonto ukuthi umdlalo wanamuhla bafuna ukuwugijima ngokuzikhandla kwazise ngowokugcina ekhaya ngaphambi kokuvalela amaholidi kakhisimusi.
Uthi okuzokwenza ube seqophelweni eliphezulu wukuthi abadlali bala makilabhu bayazana njengoba engomkhaya.
“Umqeqeshi wethu (uronnie Gabriel) ukubeke obala ukuthi ikilabhu ezonqoba lo mdlalo yileyo ezokwazi ukusebenzisa amathuba okushaya amagoli. Sifisa ukushiya abalandeli bekilabhu bethokozile futhi basikhumbule ngoba imidlalo elandelayo sizoyigijima ekuhambeni. Ngenhlanhla ngiyabuya kwazise bengisesigwebeni samakhadi aphuzi,” kusho ugumede.
Umondli “Vala” Miya oyisiphekepheke sereal Kings. uthi kuzophela izinkulumo. Uthi uyazi ukuthi amakilabhu womabili afuna ukukhombisana ukuthi ngubani umakhonya. Uthi umqeqeshi wabo usimo “Govuza” Dladla ubegxile kakhulu kubagadli ebalolisisa.
Kuzo ezenfd, imbombela United isiqashe u-edward Williams ukuzoba ngumsizi ka-ashwin Sutton ocija le kilabhu. Uwilliams ubesebenza naye usutton kwi-alexander Black Aces ephethwe ngumario nogeorge Morfou egijima kwisouth African Football Association (Safa) Gauteng ABC Motsepe League.
Imbombela United izodudulana nomthatha Bucks namuhla ngeSonto ngo-15h30 Kanyamazane Stadium, empumalanga.