Iyihlazo elikhulu eyabadlali BEPSL
EMINYAKENI eli-14 edlule u-ephraim “Shakes” Mashaba waqheliswa esigqikini sokuqeqesha ibafana Bafana emuva kokuzwakalisa ukuthi ipremier Soccer League (PSL) yaseningizimu Afrika isezingeni elifana ncimishi ngonobhutshuzwayo nelepremier League (PL) yase-england.
Umashaba washo la mazwi ngoba engafuni ukuqokela esikwatini sebafana abadlali abazinze e-europe ikakhulukazi uquinton Fortune, ngaleso sikhathi obedlala kwimanchester United yase-england.
Ibafana yayihlelelwe ukubhekana ne-england kowokubhidela indebe yomhlaba yangowezi-2010 egcine isingethwe ngelakuleli.
Sekuwumlando ukuthi i-2010 World Cup Bid Committe igcine iliqambe elesa X1 iqembu lakuleli elabhekana ne-england.
Leli qembu labe selicijwa ngu-ephraim “Jomo” Sono futhi libophele zonke izihlabani zakuleli ezabe zizinze e-europe ngaphandle kukafortune owabe engasatholakali ocingweni. Lo mdlali waphoxwa wukuthi ngaphambi kokumenyezelwa kwesikwati sikamashaba, wayechomelana ejimini nodavid Beckham ngalo mdlalo. Kuthiwa weswela umgodi wokucasha igama lakhe lingasaveli esikwatini sikamashaba. Phela ushakes wayeqhosha ngokuthi unotyren Arendse ogoba amabhola axoxa indaba kwisantos kuhle kukaBeckham obenza izimanga ngebhola kwiman Utd nakwi-england.
Ngikhumbule la mazwi kaMashaba emuva kwesikhalo cishe sawo wonke umqeqeshi WEPSL, sokugqoza kwamagoli emidlalweni yalesi sigaba. Ngibe sengibheka i- log YEPSL ngiyiqhathanisa neyepl kanjalo neyela Liga yasespain.
Kuyadabukisa ukuthi ibaroka FC ehlezi esicongweni kwipsl isahlohle amagoli ali-16 nje kuphela emidlalweni eli-12 uma uqhathanisa nemanchester City eqhwakele kwipl ngemuva kokubhakuzisa amagoli angama-44 emidlalweni eli-14. Nakwila Liga kucishe kube ngesifanayo njengoba ibarcelona ihlezi esicongweni emuva kokuhlohla amagoli angama-36 emidlalweni eli-14.
Izinga lokuhlohlwa kwamagoli emidlalweni yala maligi amabili adumile e-europe isidweba sicace bha isithombe sokuthi kusiniswa amahleza kwipsl.
Yingakho sekuphele iminyaka engaphezulu kweli-10 elakuleli lagcina ukukhiqiza umgadli ongalibheki ipali, ukusayina aphinde avelele e-europe.
Nokho ukonakala kwezinto kugqama kakhulu emdlalweni othathwa njengomkhulukazi ekhalendeni likanobhutshuzwayo lakuleli, isoweto Derby, phakathi kwe-orlando Pirates nekaizer Chiefs. Kuyihlazo ukuthi sekuphele iminyaka engama-21 kwagcina ukuthi la makilabhu asayinise umgadli ongalibheki ipali ukucisha umlando kajerry Sikhosana.
Ujerry uzakhele igama ehlohla amagoli amathathu kubrian “Spiderman” Baloyi emdlalweni wala makilabhu onqotshwe yipirates ngo-4-1 ngolwezi (November) we-1996.
Uknowledge Musona uzamile ukuyiphaphamisa isoweto Derby ekwichiefs eshaya amagoli amabili kuba ngu-3-1 koweligi. Nosithembiso Ngcobo wenze okufanayo kowamanqamu wetelkom Knockout ehlohla amagoli amabili izimpofana zidlula ngo-3-0. Yomibili le midlalo ibingowezi-2010.
Nokho muva nje la makilabhu avamise ukuba nemidlalo ezelisayo, engenawo amagoli.
Okwenzeka ebholeni lakuleli kubuyisa kimina uvalo oluyaye lube kothisha bamabanga aphezulu abajwayele ukuzwakalisa ukukhathazeka kwabo nxa sizixoxela nje, uma izifundo zabo zifeyilwa yiziqengqe, bethi lokho kukhomba ingozi elengela isikole kumatikuletsheni.