INGASE IHAMBE NEBHANOYI INKECE YE-PMB UTD
Kuphazamiseke izinhlelo kushintshwa imidlalo
KUPHAZAMISEKE izinhlelo zemaritzburg United kususwa umdlalo wayo ecape Town Stadium ulethwa eprincess Magogo Stadium, Kwamashu, njengoba kuvela ukuthi ingase icwilelwe yimali eningi ebese ibhukhe ngayo ibhanoyi.
Imaritzburg izodudulana necape Town City kowe-absa Premiership ngolwesibili ngo19h30 eprincess Magogo Stadium.
Lo mdlalo bekuhlelwe ukuthi ube secape Town Stadium njengoba kungowasekhaya wecity kodwa wasuswa ngenxa yomqhudelwano werugby 7 ozokuba kule nkundla.
Leli phephandaba lithole ukuthi imaritzburg bese ibhukhe ihhotela nebhanoyi yakhokha zonke izimfanelo zokuya kulo mdlalo.
Libe selithola ukuthi abehhotela abanankinga nokuyibuyisela imali ebese ibhukhe ngayo inkinga ngabamabhanoyi imango okuthiwa bayenqaba ukubuyisa imali, bathi amalahle awabuyeli edundee.
Leli phephandaba lishayela ufarook “Ntshebe” Kadodia umnikazi wemaritzburg ngalolu daba, uvumile ukuthi basengcupheni yokulahlekelwa yimali ebese bebhukhe ngayo imango.
“Asinankinga nalaba abanye ebese sibakhokhele, bazimisele ngokubuyisa imali inkinga yimango ayizwa mshini.
"Sesibabhalele incwadi ukuba basibuyisele imali sabachazela ngesimo esibhekene naso, sisalinde impendulo. Ngethemba ukuthi bazosamukela isizathu sethu,” kusho ukadodia.
Uqhube ngokuthi ngaphandle kwale nkinga banyelwe yinyoni esandleni njengoba lo mdlalo ulethwe Kwazulu-natal.
“Kufana nokuthi yithina esidlalela ekhaya kulo mdlalo ngakho-ke kufanele noma kanjani siwunqobe. Ngikhathazekile ngesimo esibhekene naso ekilabhini, sesigijime imidlalo eminingi singanqobi. Yilona thuba leli, phela lo mdlalo kufana nokuthi siyawuphiwa njengoba silethelwe wona ekhaya.
"Kuzofanele sidlalise okwabantu abasekhaya singahlali emuva, kube yithina esihlaselayo,” kusho ukadodia.
Leli phephandaba lizamile ukushayela kwamango ukuzwa uhlangothi lwabo kodwa kwathiwa okhulumela le nkampani ubambeke emhlanganweni.
Nokho isisebenzi sale nkampani esingagunyaziwe ukukhuluma nabezindaba sithe kuzokuba nzima ukuthi imaritzburg ibuyiselwe imali yayo.
“Ngesikhathi ubhukha uvala isikhala esisuke sizothathwa ngabanye abantu.
"Uma usuthi awusahambi kunzima ukuthi ubuyiselwe imali yakho ngoba usuke usulibulele ibhizinisi wavimba nesikhala okusuke kufanele sithathwe ngomunye umuntu.
"Into engenzeka ingathola isigamu semali eyikhokhile nalapho izokube isibonelelwa,” usho kanje.