Ziphatheni kahle kula maholide
SIVULA AMEHLO ABACULI: KNOWLEDGE SIMELANE
ABALANDELI bomculo mabangasanganiswa yisikhathi samaholide baziphathise okwezilwane emicimbini nasemakhonsathini azobe eqhubeka. Intsha ikakhulukazi siye siyibone ilahlekelwa yimiqondo, yenza izinto ebingazenzi kodwa eye izenze ngalesi sikhathi ngoba nje ijabulela lesi sikhathi.
Mningi umonakalo ozodaleka ngale nyanga eyodwa nje vo, uzibandlela (December), ekubeni kukhona esazoba khona ngonyaka ozayo. Kulaba abavele ngobuso emhlabeni kuba sengathi isifika okokugcina iyedlula. Ziningi izingane ezizoqala kuyo le nyanga ukwenza le mikhuba emibi elandelayo: Ukuphuza utshwala ngokweqile Ukubhema noma ukudla izidakamizwa
Ukuzithokozisa ngocansi olungaphephile
Ukudayisa ngemizimba ngenxa yemali
Ukugqoka ngendlela engeyinhle evusa izinkanuko kwabanye
Ukugibela izimoto zabantu abangaziwa
Ukuzikhulula esidlangaleni Ukwenza ucansi esidlangaleni Kuningi okumele abalandeli bakuqikelele njengokuthi uma belandela umculi othile abamthandayo bese besusa uthuli lwezichwe. Siyazi ukuthi kusanda kukhuzwa udlambedlu olususwe ngabalandeli bakamasikandi kamuva nje egoli, kwakhala inganono.
Lezi yizinto ezilula ukwenzeka kulesi sikhathi lapho abalandeli bejabule ngokweqile ngenxa yokucwila ezinkambeni zikafaro. Abalandeli mabangahambi nezingane emicimbini abaziyo ukuthi ingaba nobungozi - ize ibe ngcono imicimbi namakhonsathi emiculo efana ne-jazz namakwaya, neminye ehlelekile, kepha lapho kwaziwa khona ukuthi abalandeli balabo baculi vele bayafunana noma banochuku akuhambe abadala, kungalimali izingane ngendlela engafanele.
Kubo abaculi, kusemqoka ukuba bangakhulumi amazwi anochuku noma agconayo azovusela abalandeli babo ufufunyane. Ukubhimba ngenkulumo kwabaculi kwesinye isikhathi kwenzeka bethi bayantela kanti sekokheleka umlilo wequbula.
Kuyenzeka ukuba umculi angene esiteji efuna ukuhlabekisa ozakwabo asuke eboshelwe nabo kulelo khonsathi ngoba efuna kuthiwe ungcono kunabanye. Kuye kube nokuklolodelana uma abaculi bengena belandelana besho amaganyana aziswana lapho abalandeli babo bebananela.
Angisayiphathi-ke uma omunye umculi enabalandeli abaningi kunomunye - laba abayidlanzana bakhushukelwa wushukela baqale ukunengeka, kusuke ukuxabana.
Abantu mabaye emakhonsathini beyozijabulisa ngomculo wonke osuke udlalwa lapho, hhayi ngoba besophe lowo abamlandelayo. Uma sesifunde ukwenza lokho kuleli siyobe sesikhulile kwezomculo.
Le nto ithi mayifane nezepolitiki - abalandeli bonke kumele baqeqeshwe ngakulolo hlangothi, bazi ukuthi umuntu uneqembu lakhe alithandayo kepha akulungile ukuba kuzondwane, iqoma lapho ithanda khona.
Sifisela abalandeli bonke bomculo nabale ngosi yethu ukuba bazithokozise ngokuzinakekela ukuze bakwazi ukuwubona unyaka ozayo, bakhumbule ukuthi abaculi bayabadinga ukuba babavotele.