Makusebenze onembeza kwizithunywa zikakhongolose
SEKUNGAWO amagama enkehli emalungeni kakhongolose azobe eyizithunywa engqungqutheleni yokukhetha ubuholi obusha kulandela ukuphela kwehlandla lesibili kuphethe umnu Jacob Zuma kule nhlangano kanjalo nakuhulumeni.
Izithunywa kule ngqungquthela ebhekwe ngabomvu zinomthwalo wokuyokhombisa ukuthi le ntando yeningi kwayena uhulumeni uyincela ezinhlanganweni zombusazwe lohulumeni obunjwe ngazo. Ngaphezu kwalokho izithunywa zisethubeni eliyingqayizivele lokwethenjwa ngezilokotho, yizifiso nemithandazo yoquqaba lwabantu baleli zwe njengoba inhlangano yabo kuyiyo ephethe amatomu ombuso.
Phela kufanele kukhunjulwe ukuthi nakuba ihlandla lobuholi obukhona enhlanganweni liphela nje, kodwa elikahulumeni liyoze liphele ngowezi-2019. Miningi imibono futhi yehlukene mayelana nokuthi izinto zihambe kanjani kuleli hlandla lokuphatha kobuholi obuphumayo manje, nalelo elandulele.
Ubuhle bentando yeningi kuhulumeni wethu kabugcini nje ngombandela wokuba kwenziwe ukhetho njalo emuva kweminyaka eyisihlanu, nokuyisona sikhathi esimisiwe esiyihlandla lokuphatha uhulumeni, kepha noma yinini phakathi nalo, kubuye kube nelinye ithuba lokuvotela ukungamethembi umholi nxa kusobala ukuthi izinto azihambi njengoba kufanele. Kuyaziwa futhi ukuthi seyibe miningi imizamo yokukwenza lokho ngomengameli Jacob Zuma kodwa lokho akuzange kuphumelele. Akusiwona umsebenzi waleli phephandaba ukwahlulela ngokuphatha kukaMengameli Zuma kodwa obekwenzeka ngesikhathi ephethe kuxoxa indaba engadingi kutolikwa. Ekuqaleni kwalawa mazwi sithe “sekungawo amagama enkehli emalungeni azobe eyizithunywa engqungqutheleni kaKhongolose”, sikusho ngoba umengameli Zuma ubeyaye akusho njalo ukuthi izimpendulo zonke ngobuholi zisokhethweni.
Yingakho lapha sifakazela lelo phuzu lokuthi nanti elinye ithuba lokukhetha, ngakho izithunywa mazisebenzise lona ukuze kwenzeke intando yeningi. Ngamanye amazwi umengameli Zuma usuke engazibekanga esikhundleni kodwa ubekwa ngabantu.
Ngakho-ke akusizi ukubhikisha kuketulwe imigqomo kadoti, muva nje sekuba nokuqiqingwa kwetshe lentaba liyothelwa nasezindaweni ezihloniphekile okusuke kukhona ababhikishelwayo. Konke lokhu akubasizi ngalutho abantu abahluphekile nabadinga ubuholi obuqotho ukuze izwe lithuthuke liye phambili. Kulabo abesabayo ukuzwakalisa imizwa yabo ngenxa yokuba umbusazwe bengene kuwo ukuze kube nepuleti lokudla etafuleni, leli yithuba futhi lokukwenza lokhu ngenkululeko ngevoti eliyimfihlo. Ngesisho samangisi, unkk Baleka Mbete ongusomlomo wephalamende useliqhekezile idwala ngokuvumela amalungu ukuba avote ngokuyimfihlo emzameni wokugcina wokungamethembi umengameli Zuma.
Nakule ngqungquthela okungase nsukuzatshwala ihlangane, amalunga analo ithuba lokwenze njalo. Ayikho into eyobakhulula ukudlula ukwenza okushiwo onembeza babo ngesikhathi sekuvotwa. Kunye esingakucela thina luquqaba: ukushaya kwenhliziyo nemizwa akunawo umnikelo oyisa isizwe phambili. Okudingwa ngabantu baseningizimu Afrika wubuchopho kuleso naleso sithunywa esithenjwe ngethuba lokuvota ngokuyimfihlo kule ngqungquthela. Akukho okunye okusasele manje ngaphandle kokufisela izithunywa impumelelo nawonembeza.