Sekubhekwe isinqumo
Lzoqaqwa ngomgqibelo incwadi eyimfihlo
SIBHEKWE ngamehlo abomvu isimemezelo sokuthi ngubani ozongena ezicathulweni zenkosi Vela “Imisebeyelanga” Shembe okulindeleke ukuba simenyezelwe ngummeli wayo, ethembezinhle, emthwalume, ngomgqibelo mhla zili-16 kwephezulu.
Ummeli wemisebe, umnu Trevor Nkosi, wala ukhasha uku- hlawumbisela ngalolu daba kangangoba kuthe uma enxuswa YILANGA Langesonto ukuba ilubeke esithombeni ngokungalindeleka wathi: “Lolu wudaba olubucayi okungamele luphathwe budedengu. Ngisho umndeni wenkosi nebandla abavumelekile ukwazi kuze kube wumgqibelo lapho siyoqaqa khona incwadi eyimfihlo, siyifundele bonke ethembezinhle. Imisebe yasidonsa ngendlebe ukuba singalenzi iphutha elenzeka mzukwana kumenyezelwa igama layo emfihlweni wenkosi uvimbeni ‘Thingolwenkosazane’ Shembe.”
Ngisho abomndeni basashayisana ngamakhanda ukuthi kazi iyozalankomoni ngomgqibelo ethembezinhle. Kukhona abasola ukuthi hleze Imisebe iqoke omunye wabafowabo njengoba abantwana bayo besengamaklume. Imisebe ifihlwe ngolukhulu udumo ngeledlule, uhulumeni wakwazulu-natal oholwa ngumnu Willies Mchunu ewunike isizotha esiwufanele.
Okhulumela ibandla umnu Nkululeko Mthethwa uthi amakholwa asethembezinhle azoqala ukutheleka khona ngolwesihlanu elungiselela inkonzo ehlala iba khona njalo ekuseni ngeSabatha (Mgqibelo).
“Kuzothi ngezikhathi zasemini bese umnu Nkosi afunde isinqumo semisebe, kuphele amaphupho,” kuphetha umnu Mthethwa.
Kuzothi kwenziwa lesi simemezelo nje kube kusalindwe esinye senkantolo enkulu yamaJaji emgungundlovu lapho kumele kucace ukuthi isinqumo esakhishwa yinkantolo enkulu yamajaji ethekwini nyakenye sokuthi Imisebeeylanga yiyo engumholi wasebuhleni sabe sifanele yini. Amajaji amathathu abelalele isedluliso secala esenziwa ngumholi wasebuhleni inkosi umduduzi “Nyazilwezulu” Shembe abesasigodlile, nakhona akwaziwambantshi kujiya.