Usinde kukubi umculi wowokholo
Imoto iphaphalaze emgwaqweni yaphonseka exhaphozini eya emkhulekweni
“BESITHI siyaqeda ngami isitha.” Lawa ngamazwi esilomo somculi wowokholo usphumelele Mbambo, esisinde kukubi engozini yemoto enyantisayo, eshiye imoto yaso ipoqoke yaphela.
Usphumelele ozakhele udumo emncintiswaneni i-i Want To Sing Gospel naseqenjini lodumo ijoyous Celebration, uthi namanje usamangele ukuthi uphume kanjani engenamyocu kule ngozi eyenzeke ngolwesibili ekuseni.
Uthi ngesikhathi kwenzeka le ngozi ubesendleleni elibangisa empangeni enyakatho-mpumalanga yekwazulu-natal lapho bekunomcimbi obekumele adumise kuwona.
Elandisa ILANGA Langesonto uthi usuke (ekhaya) ezintatha ngenhloso yokusheshe afike endaweni yomcimbi.
“Ngithe ngisanda kwedlula ezinkwazi sengibheke ngaseMandeni kwenzeka into eyisimanga njengoba imoto kuvele kwaba sengathi ayisashayelwa yimina. Yilapho iphaphalaze khona yagcwala umgwaqo.
"Ngaleso sikhathi ngiyacula ngiyakhuleka ngoba nami bengingazi ukuthi kwenzekani,” kuchaza lo mculi engeza ngokuthi uvele wabeka konke kumdali ngesikhathi kwenzeka lokhu.
Uthi imoto iphaphalaze yaze yayokhalakathela exhaphozini. “Ngesikhathi iphaphalaza iphendukile njengoba kukhona lapho ize yahamba nangokhakhayi khona ngiphakathi,” kuqhuba yena.
Uthi nakuba uyakhuluma yimisebenzi kankulunkulu. “Kungithathe cishe isikhathi esingangehora ukuze kube khona ongibonayo njengoba lapho imoto ikhalakathele khona ibibuqamama nomgwaqo ebengihamba ngawo.
“Owesilisa obe ngowokuqala ukungibona ngimcele ukuba angithathe isithombe ukuze ngifake ezinkundleni zokuxhumana ngithole abazongisiza. Ngiyabonga kubona bonke abantu abagcine befikile endaweni yesigameko ukuzongisiza,” kulanda yena.
Uthi akaboni ukuthi imoto yakhe isengaphinde ilunge ngendlela elimale ngayo.
“Imoto isengaphinde itholakale. Ngibonga unkulunkulu ngoba umphefumulo bengingeke ngisawuthola ndawo,” ebonga.
Usphumelele usanda kukhipha i-albhamu yesibili esihloko sithi “Lishonile Ilanga”. Uthi uzoqhubeka nempilo, adumise umdali njengoba engazimisele ukujabulisa isitha ebesizimisele ukuqeda ngaye.
“Ngingumuntu kankulunkulu kanti kuyacaca ukuthi akavumanga nami,” eveza.
Usphumelele ungomunye wabaculi bowokholo abaqhakambisa umculo wamazayoni ezingomeni zakhe. lucky.cain@ilanganews.co.za