UTHEMBISA LUKHULU UMSHUNQISI WODUMO
LUKHULU luyeza kwisilomo esisematheni esizwakala ezingomeni ezishisa izikhotha kulezi zinsuku udladla Mshunqisi, ogama lakhe langempela ngu-anele Dladla (29).
Umshunqisi usematheni ngokuzwakala ezingomeni okubalwa kuzo ethi, “Memeza” kabenny Maverick; “Omunye” yedistruction Boyz; “Washa” Mlilo kabenny Maverick kanti abaningi baqale ukumazi ngevideo esabalale ezinkundleni zokuxhumana ebinezinhlamvu ezithi “Ngoba mina ngiyazithandela inavara”.
Engxoxweni ekhethekile abe nayo NELANGA Langesonto udalule ukuthi ukuduma kwezingoma ezinaye sekumvule amehlo ngalo mkhakha nakuba eqale ezijabulisela abantu enganakile.
“Bekuthi uma ngihambele umcimbi noma indawo yokujuxuza uma ngibona abantu behlelwa wumfutho bese ngiyangena ngishunqisa umcimbi uvuthe yingakho ngize ngaqanjwa ngokuthi ngingudladla Mshunqisi,” kuchaza umshunqisi engeza ngokuthi akanandisi yena kodwa uyashunqisa.
Uthi konke lokhu kuqale ngesikhathi esebenza njengompheki, uma kuqashwe inkampani yakhe iyopheka emcimbini - ubebuye anandise ajabulise abantu.
“Angikwazi ukuhlala endaweni engenabo ubumnandi, sengathi lapho ngikhona kungaba nomsindo kube mnandi,” kusho le nsizwa ezalelwe Kwamashu kodwa esihlala edurban North.
Uthi uqale wamangala ngendlela abantu abamamukele ngayo kwazise ubengaziboni ephila ngokujabulisa abantu.
“Sengibonile ukuthi kuyaphileka ngomkhakha wezikaqedisizungu. Nokho ngeke ngiyeke ukupheka ngoba yikhona engikufundele, njengoba ngizimisele ukuvula indawo yokudlela ngonyaka ozayo lapho ngizophekela abantu, ngiphinde ngibajabulise,” kuchaza umshunqisi.
Uthi ngaphandle kokuvula indawo yokudlela uzoqopha i-albhamu azimisele ukuyikhipha ungakapheli unyaka ozayo. “Empeleni sengiyihlelile impilo yami (ngihlelela unyaka ozayo). Konke okwenzeka manje kusangimangaza. Ukuzibona kumabonakude, wukuqashwa emicimbini emikhulu - konke lokhu kusangethusa ngoba yinto ebengingayilindele neze,” esho. Uqhuba ngokuthi okumjabulisa kakhulu wukubona abazali bakhe beziqhenya ngaye njengoba ngesikhathi esaqala bebengakuqondi akwenzayo.
“Kuyathokozisa ukubona imiphumela yomsebenzi wakho, ngakho ngizimisele ukuba ngingabe ngisabheka emuva,” kulanda umshunqisi, engeza ngokuthi akakashadelwa futhi akanaye umuntu ahlekisana naye.
lucky.cain@ilanganews.co.za